Diretor Sentru Formasaun Judisial, Antonino Gonçalves. Imajen/Dok. Tatoli

DILI, 21 maiu 2021 (TATOLI)—Sentru Formasaun Jurídika no Judisíariu (SFJJ), seida’uk bele realiza teste eskrita no orál ba formasaun kandidatu juiz, ne’ebé liu ona selesaun dokumentu, tanba kumprimenta hela regra serka sanitária no konfinamentu domisiliáriu jerál.

“Prosesu hotu ba majistradu judisiál-nian preparadu ona, hein publika sira-nia naran iha jornál repúblika, atu bele loke ezame eskrita. Maibé, ho situasaun COVID-19 ita seidauk bele realiza. Tanba ne’e, bainhira situasaun hotu la’o di’ak  ona ita sei anunsia teste ne’e,’’ Diretór SFJJ, Antonino Gonçalves, hateten ba jornalista Agéncia Tatoli, iha kna’ar fatin, Caicoli, sesta ne’e.

Notísia relevante:Kandidatu 209 pasa selesaun dokumentu ba vaga formasaun juiz

Vaga ne’ebé SFJJ loke iha faze dahuluk, iha fulan hirak liu-bá kona-bá formasaun atu sai juiz, iha kandidatu hamutuk na’in 209 mak pasa iha selesaun dokumentu.

SFJJ sei haruka lista kandidatu definitive, hodi publika iha jornál repúblika, hafoin marka loron ba teste eskrita no  bainhira pasa sei tuir tan teste orál.

Kona-bá prosesu  vaga daruak ne’ebé oras-ne’e daudaun loke hela ba públiku, Antónino Gonçalves hateten, iha ona kandidatu ba formasaun atu sai prokuradór hamutuk na’in 217 no defensór públiku 149 mak hatama ka submete ona sira-nia  dokumentu

Vaga ne’e sei kontinua loke ba públiku, no ekipa juri sei deside hodi halo selesaun dokumentu ne’ebé ho rigorozu.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here