Diretór Sentru Formasaun Jurídika no Judisiáriu, Antonino Gonçalves. Imajen Tatoli/Egas Cristóvão.

DILI, 18 marsu 2021 (TATOLI)-Kandidatu ba formasaun atu sai juiz iha Sentru Formasaun Jurídika no Judisiáriu (CFJJ, sigla portugés) hamutuk na’in-209 pasa iha selesaun dokumentu.

“Rezultadu ba kandidatu sira-ne’ebé hatama dokumentu ba vaga formasaun juis ne’ebé  antes ne’e fó sai hamutuk 217 no selesaun ne’ebé ekipa juri sira hala’o iha ema na’in-209 mak pasa no na’in-ualu  mak la pasa tanba la kompletu dokumentu,’’ Diretór CFJJ, Antonino Gonçalves, informa ba Agência Tatoli iha Dili, kinta ne’e.

Notīsia Relevante : Abríl 2021, CFJJ loke vaga 45 ba lisensiatura iha area direitu

CFJJ sei haruka lista kandidatu  definitivu hodi públika iha Jornál Repúblika hafoin marka loron ba faze teste eskrita no  bainhira pasa mak sei tuir tan teste orál. Tanba ne’e, bainhira serka sanitária no konfinamentu domisiliáriu termina, Antonino Gonçalves hateten, sei hahú halo teste ba kandidatura sira ne’e.

Iha parte seluk, Diretór CFJJ Antonino Gonçalves, informa katak iha semana hirak liubá loke  ba  públiku ba vaga formasaun prokuradór ninian ne’ebé sei termina iha loron 23 marsu  2021, tanba ne’e Timoroan ne’ebé lisensiadu iha area direitu interesadu bele konkorre. Nia informa mós katak  CFJJ sei loke mós ba vaga formasaun ba sai defensór públiku.

Sei rekruta formadór internasionál

Sentru Formasaun Jurídika no Judisiáriu (CFJJ) hato’o ona paresér tékniku ba Ministru Justisa (MJ), Manuel Cárceres da Costa, atu rekruta formadór internasionál hodi  bele fó formasaun ba autór judisiál sira.

Antonino Gonçalves, hateten tuir nesesidade ne’ebé iha sei rekruta tan formadór internasionál nu’udar Juiz na’in-ida, prokuradór  na’in-ida, defensór ka advogadu na’in-rua, psikólogu na’in -ida ho notáriu no konservadór na’in-ida.

Prosesu tékniku ho termu referénsia sira haruka ona ba ministériu tutela hodi hein desizaun bainhira tun ona mak sei hahú forma ekipa juri hodi hahú konkursu.

“Formadór internasionál ne’ebé sei rekruta mak hanesan hosi Portugál, Brazíl ho Cavo Verde,  tanba ita hatene ita-nia sistema justisa ne’e aplika tuir rai sira ne’e no ita presiza ema ne’ebé  ho esperiénsia ka peritu,’’ Antonino Gonçalves hateten.

Formadór sira sei mai fó formasaun ba kuadru foun judisiál sira ne’ebé daudaun ne’e CFJJ hala’o hela rekrutamentu ba kandidatu juis, prokuradór no defensór.

Jornalista       : Nelson de Sousa

Editór             : Francisco Simões

HAKEREK NO HATÁN

Please enter your comment!
Please enter your name here