Logotipu TDD. Imajen Tatoli/Egas Cristóvão.

DILI, 21 maiu 2021 (TATOLI)—Sentru Formasaun Jurídika no Judisíariu (SFJJ), halo ajustamentu ba elaborasaun materia foun iha kurríkulu, hodi bele fó formasaun ba autór judisiál foun, hanesan juiz, prokuradór ho defensór.

Diretór SFJJ, Antonino Gonçalves, hateten materia formasaun jerál ne’ebé durante ne’e hanorin ba autór judisiál foun mak hanesan, introdusaun direitu, kódigu penál, kódigu prosesu penál, kódigu sivíl, kódigu prosesu sivíl, lían portugés ba termu tékniku jurídiku no sira-seluk.

Notísia relevante:SFJJ sei loke uluk vaga lisensiatura direitu ba formasaun juiz

Alende ne’e, hanorin mós materia espesífiku-sira hanesan ba  juiz-nian, oinsá bele halo interpretasaun foti desizaun ruma, ba prokuradór atu prodús akuzasaun no defensór oinsá bele fó asisténsia ida di’ak.

“Maibé, iha avaliasaun durante ne’e ita presiza halo ajustamentu ba matéria foun-sira mak hanesan, direitu sosiedade komersiál, direitu traballu, direitu família menór, direitu administrativu, fiskál no finansa, korrupsaun, direitu tasi ka internasionál, direitu fundamentál iha konstituisaun, direitu organizasaun administrativu, direitu organizasaun sistema polítiku, planeamentu jestaun no lideransa, étika de antolojia, psikolojia, teknolojia informasaun no komunikasaun, violénsia doméstika, igualidade jéneru ho sira-seluk,’’ Antonino Gonçalves, hateten ba jornalista Agéncia Tatoli, iha kna’ar fatin Caicoli, sesta ne’e.

Matéria hirak-ne’e, SFJJ halo ajustamentu ba kurríkulu no ninia elaborasaun finaliza ona, hein fó formasaun ba kandadatu foun-sira.

Iha formasaun, SFJJ mós sei introdús mateira balun liu hosi semináriu, hodi konvida péritu-sira atu bele partilla.

Nia dehan, SFJJ halo ona estudu komparativu ho nasaun sira iha komunidade ne’ebé ko’alia lian portugés (CPLP-siglá protugés), liu-liu iha Portugal, hodi dezenvolve kurríkulu ba elaborasaun matéria sira-ne’e.

“Ita-nia kurríkulu ho elaborasaun matéria sira-ne’e ho nível internasionál, hanesan ho sentru formasaun jurídika-sira iha nasaun CPLP-nian liu-liu Portugal, tanba ita-nia sistema justisa, maioria adopta hosi ne’ebá,’’ Antónino Gonçalves, subliña.

Tanba ne’e, kandidatu-sira bainhira tuir formasaun, tenke aproveita tempu ho didi’ak atu bele kapasita an sai kapábel liu-tan.

“kurríkulu ba matéria ne’ebé ita ajusta, sei forma autór judisial ne’ebé ho kapasidade preparadu ba futuru atu sai juiz, prokuradór no defensór,’’ nia hateten.

Oras-ne’e daudaun, SFJJ iha ona formadór internasionál na’in-rua hosi Portugal no hato’o ona pedidu ba ministériu tutela, atu rekruta tan formadór internasionál nu’udár  juiz ida, prokuradór ida, defensór rua ho psikólogu ida, atu bele fó formasaun ba kandidatu foun.

SFJJ presiza nafatin formadór internasionál, tanba durante tinan 20 ona, Timor-Leste  seidauk halo investimentu di’ak.

“Maibé komesa tinan oin, ita hanoin ona hodi selesiona mós formadór nasionál, atu bele akompaña asistente, nune’e iha futuru bele fó formasaun rasik, tanba iha juiz antigu ida ka rua no jurista balun ho karreira to’o tinan ualu, ho dosente-sira iha universidade balun iha esperiénsia di’ak, atu bele sai formadór,’’ nia dehan.

Formasaun ba autór judisiál foun atu sai juiz, prokuradór no defensór sei hetan teoria tinan rua iha sentru formasaun no tinan ida sei halo estájiu.

Oras-ne’e daudaun, SFJJ loke ona vaga ba kanditadu atu tuir formasaun sai juiz, iha ona faze atu tama teste eskrita no prokuradór ho defensór hala’o hela inskrisaun.

Suspende formasaun komplementár

Iha ámbitu implementasaun serka sanitária no konfinamentu domisiliáriu, SFJJ suspende atividade  formasaun komplementár ba juiz, prokuradór no defensór.

Diretór SFJJ, Antonino Gonçalves, hateten, bainhira autór judisiál-sira haree ba lei foun ruma no julgamentu kazu ne’ebé ho nia kompleksidade bo’ot, iha difikuldade bele hato’o pedidu atu hetan formasaun.

Tanba ne’e, formasaun komplementár nu’udár formasaun kontínua ba juiz, prokuradór no defensór ne’ebé oras-ne’e daudaun hala’o hela kna’ar atu bele aumenta no hadi’a liu tan sira-nia koñesimentu.

“Ita mós simu pedidu hosi parte Defensoria Públika atu bele fó formasaun kona-bá lei foun Medida Prevensaun no Kombate Korrupsaun (MPCC-siglá portugés), maibé ho situasaun COVID-19, ita labele realiza,’’ nia informa.

Maski nune’e, SFJJ kontinua atende juiz balun ne’ebé iha difikuldade hodi halo konsultasaun.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here