DILI, 25 janeiru 2021 (TATOLI)-Sentru Formasaun Jurídika no Judisiáriu (SFJJ) iha faze dahuluk, fevereiru, tinan ne’e, sei loke uluk vaga ba timoroan lisensiatura iha area direitu hodi tuir kursu ba kandidatura sai juis.
Iha loron 21 janeiru, liuhosi enkontru Konsellu Jerál Sentru Formasaun Jurídiku no Judisiáriu ne’ebé lidera direita hosi Ministru Justisa (MJ), Manuel Cárceres da Costa ho membru ne’ebé hola parte hanesan Prezidente Tribunál Rekursu, Deolindo dos Santos, Prokuradór Jerál Repúblika, José Ximenes, Diretór SFJJ, Antonio Gonçalves ho Defensór Públiku Jerál, Câncio Xavier, deside ona planu ba faze dahuluk atu loke vaga atu tuir kursu ba juis.
Notísia Relevante : SFJJ iha livru sufisiente fasilita leitura ba majistradu judisiál
Ba kursu prokuradór ho defensór públiku, Antonino Gonçalves, hatutan seidauk bele realiza tanba formadór iha area ne’e seidauk iha tanba ho situasaun COVID-19 ne’ebé difikulta sira iha Portugál no Brazil atu dezloka mai Timor-Leste .
“Razaun fó prioridade uluk ba formasaun inisiál ba kandidatura juis tanba daudaun ne’e ita iha ona formadór iha area juis ninian hosi Portugál na’in-rua,” Diretór SFJJ, Antonino Gonçalves, informa ba Agéncia TATOLI iha nia kna’ar fatin, Caicoli, Dili, segunda ne’e.
Nia hatutan, agora hein despaxu Ministru Justisa, Manuel Cárceres nian ba abertura formasaun ne’e posibilidade iha fevereiru nia laran hodi loke ona ba públiku bele konkorre ba prosesu teste hotu sei hahú formasaun.
Antonino Gonçalves, haktuir iha enkontru Konsellu Jerál Sentru Formasaun Jurídiku no Judisiáriu mós halo mudansa ba númeru vaga kandidatura juis, prokuradór, defensór públiku ne’ebé antes ne’e ho de’it ema na’in-15 kada vaga maibé agora aumenta ba 25 nune’e fó oportunidade iha formasaun nian laran se mak valór di’ak bele prienxe ba vaga 15.
Jornalista : Nelson de Sousa
Editór : Francisco Simões
