Plenária Parlamentu Nasionál. Imajen Tatoli/António Gonçalves.

DILI, 21 maiu 2021 (TATOLI)—Parlamentu Nasionál (PN) sei halo aprovasaun finál globál ba proposta alterasaun lei defeza nasionál tanba Komisaun B ne’ebé trata asuntu negósiu estranjeiru, defeza no seguransa, finaliza ona relatóriu no paresér.

Notísia Relevante: PN aprova proposta alterasaun ba lei defeza nasionál iha espesialidade

“Semana oin plenária sei halo votasaun finál global ba proposta-lei defeza nasionál,” Sekretária Meza Parlamentu Nasionál, Deputada Lídia Norberta dos Santos, informa liuhosi konferénsia imprensa, iha uma fukun, sesta ne’e.

Entretantu, Komisaun B iha tersa foin lalais aprova ona proposta alterasaun ba lei defeza nasionál iha faze espesialidade ho rezultadu votasaun a-favór neen (6).

Prezidente Komisaun B, Deputadu José Agostinho Siqueira ‘Somotxo’ esplika iha proposta alterasaun dahuluk ba lei defeza nasionál ne’e hamutuk artigu 12 nune’e kondiz ho situasaun reál forsa armada nian. Razaun seluk Governu husu alterasaun tanba dezde 2010 la atualiza.

Somotxo esplika, Governu husu ba Parlamentu Nasionál atu altera artigu hamutuk 12 iha Lei Defeza Nasionál númeru 3/2010.

“Proposta-alterasaun ne’ebé Ministériu Defeza submete mai husu halo alterasaun ba artigu hamutuk 12 iha Lei Defeza Nasionál, atu diskute no iha loron tersa ne’e ami aprova ona iha espesialidade,” Prezidente Komisaun B ne’e esplika.

Entretantu Governu liuhosi Ministériu Defeza propoin altera artigu 14, 18, 19, 20, 31, 32, 34 to’o 57 iha Lei Defeza Nasionál (lei númeru 3/2010).

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here