Imajen/Media PR.

DILI, 19 maiu 2021 (TATOLI)—Parlamentu Nasionál (PN) liuhosi Komisaun B ne’ebé trata asuntu negósiu estranjeiru, defeza no seguransa, tersa ne’e aprova ona proposta alterasaun ba lei defeza nasionál iha faze espesialidade ho rezultadu votasaun afavór neen (6).

Notísia Relevante: PN aprova alterasaun lei defeza nasionál iha faze jeneralidade

“Proposta-alterasaun ne’ebé Ministériu Defeza submete mai husu halo alterasaun ba artigu hamutuk 12 iha Lei Defeza Nasionál, atu deskute no iha loron tersa ne’e ami aprova ona iha espesialidade,” Prezidente Komisaun B, Deputadu José Agostinho Siqueira ‘Somotxo’, informa ba Agência TATOLI, iha uma fukun, kuarta ne’e.

Somotxo esplika, iha proposta alterasaun dahuluk ba lei defeza nasionál ne’e hamutuk artigu 12 nune’e kondiz ho situasaun reál forsa armada nian.

Razaun seluk, nia dehan, Governu husu alterasaun tanba dezde 2010 la atualiza no Governu husu ba Parlamentu Nasionál atu altera artigu hamutuk 12 iha Lei Defeza Nasionál númeru 3/2010.

Governu liuhosi Ministériu Defeza propoin altera artigu 14, 18, 19, 20, 31, 32, 34 to’o 57 iha Lei Defeza Nasionál (lei númeru 3/2010).

Prezidente Komisaun B ne’e esplika, iha alterasaun ne’e mós previstu kompeténsia Prezidente Repúblika nian, Primeiru-Ministru nia kompeténsia, membru Governu ne’ebé tutela iha área defeza nia kompeténsia, Xefe Estadu Maiór Jenerál (CEMG-sigla portugés) nia kompeténsia, Vise-Xefe Estadu Maiór Jenerál (VCEMG-sigla portugés) nia kompeténsia no komandante komponente sira-nia kompeténsia.

“Tanba saida mak Prezidente Repúblika tenke nomea to’o komandante komponente sira, ne’e tanba atu prevee ba tempu naruk,” nia dehan.

Tuir nia, iha alterasaun ne’e atu uniformiza mós komponente tolu (3) iha Forsa Armada komposta hosi navál, terrestre no komponente ida sei mosu iha futuru mak aéru.

“Komponente ne’e nia komandante ne’e la’ós hanesan kapitaun ida, maibé brigadeiru ida mak sei komanda no alterasaun ne’e loke dalan ba tempu naruk nian,” nia hateten.

Tuir ajenda ne’ebé Agência TATOLI, asesu votasaun finál global iha plenária sei realiza iha loron 24 maiu, tuku 15.00 lorokraik.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here