Aktividade traballador sira iha Ponte Kais Dili bainhira hatuun foos hosi Ro tula ba Kamioneta hodi lori ba hatama iha kompania nia armajen. Imajen/Antonio Goncalves.

DILI, 21 maiu 2021 (TATOLI)—Diretór Jerál Ministériu Solidariedade Sosiál no Inkluzaun (MSSI), Rui Manuel Gago Exposto, hateten hahú hosi Governu implementa serka sanitária to’o oras ne’e, MSSI fó ona apoiu foos saka 35.748 ba ema kbiit laek no família afetadu dezastre naturál iha territóriu nasionál.

Notísia Relevante: MSSI distribui ona foos saka 28.000 ba família vulnerável

“Hahú serka sanitária to’o mai ohin loron ne’e, MSSI fó ona apoiu foos hamutuk saka 35.748 ba komunidade iha nível nasionál inklui munisipál ne’ebé mak fó ona ba ema kbiit laek sira, família afetadu dezastre naturál no ema ho defisiénsia sira. MSSI mós fó apoiu ba instituisaun sira-ne’ebé mak durante ne’e hala’o servisu hamutuk ho MSSI hanesan labarik orfonatu sira, ema ho defisiénsia, estudante hela iha kost, vítima bazea ba jéneru, no grupu alvu sira seluk,” Rui Manuel Gago Exposto hateten liuhosi konferénsia imprensa, iha salaun MSSI, Caicoli, Dili, sesta ne’e.

Governu liuhosi MSSI fó apoiu foos ba estudante sira iha kost ne’e hamutuk saka 11.979, ba estudante sira iha eskola sekundáriu ne’e MSSI fó fóos saka 1.000 ne’ebé rai iha armajén Ministériu Edukasaun Juventude Desportu (MEJD) nian.

Maibé, nia dehan. mekanizmu fahe no jere MEJD mak hatene no oinsá fahe ba estudante nível sekundária ne’ebé hela iha kost, no apoiu ba ema ho defisiénsia ne’e hamutuk foos saka 950.

MSSI moós fó apoiu ba membru Polísia Nasionál Timor-Leste (PNTL) ne’ebé afeta ba dezastre naturál hamutuk foos saka 1.000 no apoiu ba kbiit laek iha Munisípiu Dili ho foos saka 5.755 ba família hamutuk 1.667.

Diretór Jerál ne’e hatutan, to’o ohin loron MSSI nia ekipa kontinua tún ba terrenu hodi identifika no fó apoiu diretamente ba vítima sira-ne’ebé presiza tebes tulun hosi MSSI nian.

Maske MSSI nia informasaun kona-ba apoiu la fó sai iha mídia maibé iha situasaun serka sanitária no pandemia COVID-19, MSSI sempre ativa iha komunidade nia leet hodi fó tulun sira.

“Ami la taka matan no ami kontinua esforsu hodi servisu iha loron sábadu-domingu hodi ajuda ita-nia sidadaun ne’ebé presiza duni ita-nia tulun ba ai-han sira tanba ami prontu fó tulun. Maibé autoridade lokál sira mós tenke hakbesik no identifika ninia komunidade ne’ebé defísil ba ai-han. MSSI lahatene loron feriadu tanba MSSI hakarak atu oinsá asegura ai-han ba ita-nia komunidade iha territóriu nasionál,” Exposto hateten.

Daudun ne’e MSSI iha Sentru Solidaridade Sosiál iha kada Munisípiu, entaun nia apela ba komunidade ne’ebé nesesita tulun hosi MSSI, karik MSSI la identifika problema sosiál balun bele hakbesik aan ba Sentru Solidaridade Sosiál hodi nune’e bele hetan tulun.

Bainhira atu hetan tulun hosi Sentru Solidaridade Sosiál iha munisípiu, nia dehan, komunidade presiza hato’o proposta ba xefe suku, atu nune’e fasilita hetan tulun tanba xefe suku sira mak hatene liu komunidade iha kada suku no aldeia laran.

“Karik to’o agora iha komunidade balun ne’ebé seidauk hetan apoiu karik, husu atu koordena ho autoridade lokál hodi nune’e bele ba iha ami-nia Sentru Solidaridade Sosiál, hodi hetan ai-han tanba kada armajén iha sentru munisípiu sira foos ami tau hotu ona,” nia dehan.

Ezemplu, nia dehan, iha Munisípiu Manatuto, Postu Administrativu Laclo, MSSI haruka ona foos saka 280 ba armajén no iha Lacluta foos saka 391 ne’ebé MSSI mobiliza liuhosi helikopteru mak lori ba, maibé MSSI servisu hamutuk ho Sekretáriu Estadu Protesaun Sivíl (SEPS).

“Foos sira ne’e ita fahe hotu ona ba ema kbiit laek sira no munisípiu seluk ita-nia Prezidente Autoridade Munisipál no Adminiatradór Munisípiu koordena ona ho Sentru Solidaridade Sosiál hodi identifika benefisíu no fahe ona. Ezetu Munisípiu Covalima mak seidauk,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here