Membru Grupu Voluntáriu PNTL-Mama Bolu kontinua hala’o dezinfeta iha fatin risku ba kontájiu COVID-19, iha Hospital Nascional Guido Valadares (HNGV). Imajen/Mídia Grupu Mama Bolu.

DILI, 20 maiu 2021 (TATOLI)–Iha selebrasaun loron restaurasaun independénsia ba dala-XIX ne’e, juventude sira-ne’ebé hamahon aan iha grupu voluntáriu PNTL-Mama Bolu kontinua halo dezinfeta iha fatin risku ba kontájiu COVID-19, iha Hospital Nascional Guido Valadares, Bidau, Dili.

Portavós Ekipa Mama Bolu, Octavio Cardoso, hateten ekipa Mama Bolu sempre prontu ajuda kualker instituisaun ne’ebé mak husu pedidu atu halo atividade dezinfeta iha sira-nia fatin no fatin risku sira.

Notísia Relevante: BNCTL apoiu $1.000 ba grupu voluntáriu PNTL-Mama Bolu

Portavós Ekipa Mama Bolu, Octavio Cardoso. Imajen/Mídia Grupu Mama Bolu.

“Hau hanoin, ohin, ita selebra loron restaurasaun independensia ba dala-XIX nu’udar hanesan loron espesial tebes ba povu doben Timor-Leste. Maske nune’e, ekipa voluntáriu PNTL-Mama Bolu kontinua halao atividade dezinfeta iha HNGV hodi prevene COVID-19,” Octavio Cardoso hateten ba Agência Tatoli, iha HNGV, kinta ne’e.

Nia dehan, ekipa Mama bolu simu pedidu hosi HNGV no hala’o atividade dezinfeta iha sala pediatria 1 no 2, laboratóriu HNGV, no maternidade hodi prevene COVID-19, maske iha situasaun doutór no infermeiru sira mós kontinua hala’o sira-nia atendeimentu ba pasiente sira hanesan baibain.

“Hau hanoin ekipa Mama Bolu sempre prontu iha kualker loron no prontu nafatin iha oras 24 nia laran, entaun iha tuku ida ka tuku rua daderrsan madrugada nia laran mós ami sempre realiza serbisu dezinfeta nian. Grupu ida-ne’e sempre hala’o serbisu la haree ba tempu kalan, loron, udan no malirin,” nia dehan.

Portavós ne’e hatutan, daudaun ne’e totál membru Grupu Mama Bolu hamutuk na’in-30 maibé agora daudaun ne’e membru na’in-23 mak sei ativu hodi hala’o atividade dezinfeta iha terrenu.

Jornalista: Domingos Piedade Freitas

Editór: Cancio Ximenes

 

HAKEREK NO HATÁN

Please enter your comment!
Please enter your name here