PNTL-Mama Bolu serbisu hamutuk ho PNTL dezinfekta fatin públiku iha Dili. Imajen Tatoli/António Gonçalves.

DILI, 11 maiu 2021 (TATOLI)-Banku Nasionál Komérsiu Timor-Leste (BNCTL, sigla portugés), liuhosi inisiativa hodi kria konta bankária ida ho naran Solidariedade ba Maun-Alin, hodi apoiu fundu $1.000 no máskara 400 ba grupu voluntáriu Polísia Nasionál Timor-Leste (PNTL)-Mama Bolu  atu apoiu ba vítima dezastre naturál.

Notísia Relevante : KAATL apoia materiál dezinfeta ba Grupu ‘Mama Bolu’

Xefe Divizaun Planeamentu Negósiu no Komersializasaun BNCTL, Alcino Monteiro, hateten Orsamentu $ 1.000 ne’ebé BNCTL apoiu ba grupu voluntáriu PNTL-Mama Bolu ne’e la’ós hosi BNCTL, maibé ema hotu-hotu nia kontribuisaun liuhosi inisiativa BNCTL ne’ebé harii konta bankária ho naran Apoiu Solidariedade ba Maun-Alin ho objetivu atu sé de’it hakarak apoiu vítima dezastre naturál ho osan liuhosi konta bankária refere.

“Atu hateten de’it katak fundu $1.000 ne’ebé ohin ami fó apoiu ba ekipa PNTL-Mama Bolu ne’e, ami halibur hosi ema hotu-hotu, tanba liga ba situasaun dezastre naturál ne’ebé akontese iha loron 04 abríl liubá, BNCTL foti kedas inisiativa ida hodi kria konta bankária ida ho naran Solidariedade ba Maun-Alin, entaun konta bankária ne’e nia alvu ne’e to’o fulan ida, atu haree fundu sira tama ne’e hira, entaun to’o horiseik ami haree fundu sira ne’ebé tama hamutuk $3.000,” Alcino Monteiro, informa ba jornalista-sira hafoin entrega fundu $1.000 ba ekipa PNTL-Mama Bolu iha Salaun BNCTL, Caicoli, Dili, tersa ne’e.

Nia dehan, hosi orsamentu $3.000 ne’e haree katak dezastre naturál ne’e la’ós iha Dili de’it, maibé akontese mós iha munisípiu sira, nune’e BNCTL liuhosi reziliénsia foti desizaun ida katak hosi orsamentu  $3.000 ne’e koloka ba munisípiu tolu, hanesan Dili liuhosi grupu voluntáriu PNTL-Mama Bolu, Ainaro ba iha Maubisse no Manatuto ba  Laclo ne’ebé kada  hetan $1.000.

Iha biban ne’e mós BNCTL husu ba ekipa PNTL-Mama Bolu  bainhira ezekuta hotu osan ne’ebé  simu tenke hato’o fali relatóriu ba BNCTL atu BNCTL bele públika relatóriu refere liuhosi sira-nia pájina Facebook, nune’e na’in ba osan ne’ebé kontribui ne’e hatene katak osan ne’e to’o duni objetivu ne’ebé hotu-hotu hakarak.

Koordenadór grupu voluntáriu PNTL-Mama Bolu, Aqing Ung hateten, orsamentu $1.000 ne’ebé BNCTL apoiu ne’e ba oin sira sei sosa máskara no hand sanitizers hosi fahe ba vítima dezastre naturál sira.

“Fundu $1.000 no masker ne’ebé BNCL fó apoiu ami ba oin sei distribui ba vítima dezastre sira hanesan tasi-tolu no ami sei hasa’e relatóriu distribuisaun ne’e liuhosi ami-nia pájina Facebook hanesan relatóriu eletróniku ida ba BNCTL katak fundu ne’ebé ami hetan ezekuta tuir duni ita hotu-nia hakarak,” nia dehan.

Nia hatutan, ne’ebé fundu ne’ebé ohin sira hetan, ba oin sei sosa máskara no hand sanitizers ba vítima-sira nune’e mós sei utiliza ba grupu voluntáriu PNTL-Mama Bolu  nia presiza, hanesan enxe mina ba voluntáriu sira-nia transporte no sosa pulsa telefone ba sira nune’e bele halo komunikasaun ba malu bainhira ema presiza grupu Mama Bolu nia apoiu.

“Ami servisu voluntáriu, tinan ida fulan rua ona, ho espíritu voluntarizmu de’it, laiha saláriu tanba ne’e fundu-sira ne’ebé ami hetan hato’o ami-nia agradesimentu ba timor-oan tomak ne’ebé tau ona sira-nia solidariedade hamutuk liuhosi konta bankária BNCTL ne’ebé kria ona, ida ne’e inisiativa di’ak tebes hosi BNCL tanba ita bele hatene fundu ne’e tama iha fatin ida no to’o duni objetivu,” nia hateten.

Grupu Mama Bolu  kontinua serve Komunidade hotu iha Dili laran hanesan dezinfeta fatin públiku sira no kontinua fó apoiu prevensaun COVID-19 nian ba abitante-sira hotu iha Kapitál Dili.

Nia informa, antes ne’e grupu Mama Bolu  seidauk hetan apoiu ofisiál ruma, tanba ne’e loron ida sira servisu loron sorin de’it tanba hahán ba voluntáriu sira laiha, maibé hafoin hetan apoiu ofisiál hosi AATLA sira servisu loron tomak no kalan kontinua nafatin dezinfeta Ospitál Nasionál Guido Valadares (HNGV).

Nia hatutan, ba apoiu materiál ne’ebé durante sira hetan hosi Servisu Autónomu Medikamentu Ekipamentu Saúde (SAMES- sigla portugés), hanesan máskara, ai-moruk dezinfeta rasik, no hand sanitizers hosi emprezáriu juventude Xineza iha Timor-Leste hamutuk kaixa 10.

Objetivu grupu Mama Bolu nia eziste ne’e atu halo dezinfeta ba fatin hotu-hotu ka prevensaun hasoru surtu COVID-19, maibé Timor-Leste hasoru tan kalamidade iha loron 04 abríl, nune’e ekipa PNTL-Mama Bolu la haree de’it prevensaun COVID-19 maibé servisu hamutuk Movimentu Tasi Moos, no seluk tan haree no ajuda mós ba vítima dezastre naturál sira iha Kapitál Dili, liuliu Masilidun, Tasi-Tolu fó apoiu hanesan, ai-han no bee-moos, inklui fase estrada públiku sira.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here