Ekipa konjunta kompostu hosi Unidade Polísia Marítima (UPM), hamutuk ho FALINTIL Forsa Defeza Timor-Leste (F-FDTL), Komponente Navál, kontinua buka-tuir mate-isin ne’ebé mout ho ró, kuarta (19/05/21). Imajen Tatoli/Eugénio Pereira.

DILI 19 maiu 2021 (TATOLI)—Komandu Jerál, Polísia Nasionál Timor Leste (PNTL), kontinua orienta Unidade Polísia Marítima (UPM), koordena ho FALINTIL Forsa Defeza Timor-Leste (F-FDTL), Komponente Navál, atu buka-tuir mate-isin na’in-rua, hanesan Nour ho Fransisco, ne’ebé lakon iha asidente marítima ho ró Adewa-01 iha sábadu (14/05).

Portavóz Komandu Jerál PNTL, Superintendente Xefe, Arnaldo de Araújo, dehan maski mate-isin na’in-rua mout lakon durante loron neen ona, maibé UMP ho Komponente Navál hetan apoiu hosi ró peska komunidade Ataúro, hodi buka iha área tasi Ataúro, fronteira tasi entre Liquica no Alor-Indonézia, inklui tasi parte Cristo Rei, Dili, to’o área Beheda baliza Manatuto.

Notísia relevante:UPM-Komponente Navál hetan ona mate-isin Daniel Martins

“Agora mate-isin na’in-rua hetan ona, no ekipa kontinua buka nafatin na’in-rua seluk,” Arnaldo de Araújo, hateten ba jornalista-sira, iha Komandu Jerál PNTL, Caicoli, kuarta ne’e.

Arnaldo de Araújo rekoñese katak, maski laloran tasi no anin boot, maibé ekipa konjunta hala’o nafatin operasaun hodi buka-tuir vítima-sira.

Nia informa, Komandante Jerál PNTL, Komisáriu Polísia, Faustino da Costa orienta ona atu halo investigasaun ba asidente liuliu kauza loloos hosi ró ne’ebé mout.

“Polísia sei buka-tuir informasaun hodi halo investigasaun kle’an, tanba saida mak ró ne’e mout. Ida-ne’e knaar UPM atu bele asegura vida komunidade bainhira halo viazen ho ró kiik, tenki kuidadu tula sasán labele todan liu fali kapasidade ró-nian,” nia subliña.

Iha fatin hanesan, Komandante UPM, Superintendente Asistente, Basílio de Jesus hateten, UPM koloka ona membru UPM Dili, no Postu Maritima Beloi-Ataúro utiliza ró Lusitania, NRTL Dili, NRTL Hera, NV Timor-Leste, speed boat 12 no ró F-FDTL kontinua buka natin iha área ne’ebé deside ona.

UPM nu’udár parte ida hosi Sistema Autoridade Marítima no estabelese ona espesifikamente atu fó vijilánsia no monitoriza área tasi-ibun tuir Lei orgánika PNTL, dekretu-Lei 9/2009, artigu 32 alinea 1.

Misaun atu kuadru autoridade marítima salvaguarda ema-nia moris iha tasi no atu fornese serbisu salva marítima tuir artigu 32 (2) (f) no fó asisténsia ba kualkér ema ne’ebé hetan susar no atu lakon iha tasi laran.

Iha 17 maiu 2021, ekipa kojunta kompostu hetan ona mate-isin médiku Daniel Martins, ne’ebé mout hamutuk ho Timoroan na’in-neen ho ró Adewa-01, bainhira hala’o viazen hosi Dili ba Ataúro, iha sábadu (15/05).

Daniel Martins nu’udár médiku iha Ospitál Nasionál Guido Valadares (HNGV sígla portugés), no ekipa konjunta hetan ninia mate-isin, iha área tasi Dolok-oan parte Cristo Rei nia-kotuk, iha tuku 10:00 otl.

Iha loron hanesan, ekipa hetan mós mate-isin António Alves (53) iha área tasi klaran área Berau, Ataúro, ho kondisaun namlele hela iha bee leten, iha tuku 15:10 otl.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here