Ekipa kojunta Unidade Polísia Marítima (UPM) ho Komponente Navál F-FDTL, entrega mate-isin, médiku Timoroan, Daniel Martins, ba parte HNGV. Imajen Tatoli/Eugénio Pereira.

DILI, 17 maiu 2021 (TATOLI)—Ekipa kojunta kompostu hosi Unidade Polísia Marítima (UPM), no FALINTIL Forsa Defeza Timor Leste (F-FDTL), Komponente Navál, buka no hetan ona mate-isin médiku Daniel Martins, ne’ebé mout hamutuk ho Timoroan na’in-neen ho ró Adewa-01, bainhira hala’o viazen hosi Dili ba Ataúro, iha sábadu (15/05).

Daniel Martins nu’udár médiku iha Ospitál Nasionál Guido Valadares (HNGV sígla portugés), no ekipa konjunta hetan ninia mate-isin, iha área tasi Dolok-oan parte Cristo Rei nia-kotuk, iha tuku 10:00 otl.

Notísia relevante:UPM-Naval kontinua buka abitante haat mout iha tasi

Hafoin hetan mate-isin, ekipa UPM transporta kedan ho ró ba Portu UPM Lecidere Dili, no kontinua ba HNGV.

Komandante UPM, Superintendente Asistente, Basílio de Jesus, informa mate-isin Daniel Martins, ekipa hetan ho distánsia metru 50 hosi rai-maran ba tasi-laran.

“Ita-nia médiku ne’e, ita konsege hetan iha área Cristo Rei ho kondisaun mate ona,” Basílio de Jesus hateten ba jornalista, iha HNGV, segunda ne’e.

UPM kontinua buka-tuir vítima na’in-tolu hanesan, António Silva, Fransisco no Naor iha tasi parte Ataúro, Liquiça, Hera to’o Metinaro.

“Ita kontinua koopera ho Komponente Navál Hera, sei esforsu buka-tuir nafatin vítima na’in-tolu seluk, ne’ebé seidauk hetan,” nia subliña.

Iha domingu (16/05), ekipa konjunta UPM no Komponente Navál, hetan ona vítima na’in-tolu nu’udár ró na’in, hanesan Moises do Carmo (47), Ferdi Gomes (17) no Nuno Alves ne’ebé konsege nani sai hosi tasi klaran ba mosu iha área Dolok-oan ho kondisaun isin lolon kanek, tanba tubaraun mak tata.

Vitima na’in-tolu oras-ne’e daudaun sei hala’o hela tratamentu saúde iha HNGV.

Vitima na’in-hitu hala’o viazen ho ró Adewa-01 sai-hosi Dili iha tuku 09:00 otl, tula sementi saka 50 no sasán nesidade bázika, inklui gazolina, bainhira to’o tasi klaran, ró hasoru korrente tasi ne’ebé boot to’o ró mout.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here