Imajen/Media PR.

DILI, 29 marsu 2021 (TATOLI)—Parlamentu Nasionál (PN), segunda ne’e, aprova proposta-alterasaun ba lei defeza nasionál iha faze jeneralidade tanba lei refere eziste liu tinan 10 ona. Hafoin diskusaun naruk, reprezentante povu sira aprova ho rezultadu votasaun a-favór 37, kontra 0 no abstensaun 13.

Notísia Relevante: PN sei diskute proposta alterasaun ba lei defeza nasionál

“Nune’e proposta-lei númeru 21/V(2a) prosede primeira alterasaun ba lei númeru 3/2010, 21 abríl kona-ba Lei Defeza Nasionál aprovadu iha jeneralidade,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária.

Tuir Rejimentu Parlamentu Nasionál (RPN) bainhira diskusaun ne’e aprovada iha jeneralidade, sei kontinua diskute iha plenária kada artigu iha espesialidade maibé tanba vijénsia COVID-19 entaun plenária deside diskute faze espesialidade nian iha Komisaun B. Nune’e, rezultadu votasaun hodi haruka ba Komisaun B ne’e a-favór 42, kontra 0 no abstensaun 6.

“Tanba ne’e proposta-alterasaun ba Lei Defeza Nasionál fila-fali ba Komisaun B atu diskute no aprova iha espesialidade no plenária hein atu halo aprovasaun finál globál. Ordena no organiza diskusaun ho membru Governu área relevante nian, komesa semana oin karik bele hahú ona diskusaun iha espesialidade,” PPN aviza ba deputadu sira.

Entretantu Ministru Defeza, Filomeno Paixão de Jesus, esplika Governu husu halo altersaun dahuluk ba artigu hamutuk 12 iha lei númeru 3/20110, 21 fevereiru kona-ba lei defeza nasionál tanba liu ona tinan 10.

“Durante temporada ida-ne’e iha alterasaun barak mak ita halo durante tinan 10, hanesan komponente kona-ba Sistema forsa nian, ita presiza armoniza lei ida-ne’e ho konseitu estratéjiku seguransa nasionál ne’ebé ita aprova iha dezembru 2016, no konseitu estratéjiku militár ne’ebé mak foin aprova iha 2020 kona-ba sistema forsa nasionál, misaun forsa armada. Ne’e ho dokumentu ne’ebé estruturante,” Ministru Filomeno Paixão esplika.

Nia hatutan, alterasaun ne’e mós konsagra kompeténsia Primeiru-Ministru nian hamutuk ho membru Governu ne’ebé kompete matéria defeza nian propoin ba Konsellu Ministru kona-ba nomeasaun no ezonerasaun.

“La’ós de’it nomeasaun no ezonerasaun Xefe Estadu Maiór Jenerál nian (CEMG-sigla portugés), Vise-Xefe Estadu Xefe Maiór Jenerál nian (VCEMG-sigla portugés) maibé ema ida-ne’e ita haluha maka Xefe Estadu Maiór (CEM-sigla portugés) ezemplu hanesan jenerál Coliati. Ne’e nunka konsta iha Lei Defeza Nasionál,” nia dehan.

Nune’e mós prosede mós ba modifikasaun kompozisaun konsellu superior defeza militár, ne’e prinsipál nu’udar órgaun konsultivu mai hosi membru Governu kompetente matéria defeza nian.

“Ida-ne’e tanba ita haree katak konsellu superiór defeza militár agora ne’e funsiona iha Ministériu Defeza ho F-FDTL, la integra jenerál sira-ne’ebé ba reforma ona. Jenerál sira-ne’ebé iha reforma ne’e sei bele kontrolu ida kona-ba komandu F-FDTL ne’e liuhosi órgaun konsultivu konsellu superior defeza militár,” nia dehan.

Tanba iha situasaun prinsipál sira tenke ejize iha lei, katak konsulta ba iha konsellu defeza militár tenke bolu katuas sira-ne’ebé iha tiha ona reforma ona fó sira-nia opiniaun tanba defeza ne’e kestaun primordiál nasaun nian

Nia hatutan, iha proposta-alterasaun ne’e mós konsta Xefe Estadu Maiór no Vise-Estadu Maiór tenke rona Xefe Estadu Maiór Jenerál (CEMG-sigla portugés) nia hanoin.

Governu liuhosi Ministériu Defeza propoin ba Parlamentu Nasionál husu altera artigu hamutuk 12 kompostu artigu 14, 17, 18, 20, 29, 31, 32, 33, 34, 35, 36 no 57 iha lei refere. Governu aprezenta proposta-alterasaun ne’e bazea ba Konstituisaun RDTL artigu 97 no artigu 115.

Objetivu hosi alterasaun dahuluk ne’e atu armoniza ho dokumentu konjuntu sentrál iha definisaun polítika defeza nasionál no formulasaun asaun estratéjiku militár estadu nian, dezignadamente konseitu estratéjiku defeza no seguransa nasionál, konseitu estratéjiku militár, sistema forsa nasionál, misaun forsa armada no dispozitivu iha F-FDTL.

Entretantu, relatóriu no paresér hosi Komisaun B ne’ebé trata asuntu negósiu estranjeiru, defeza no seguransa konsidera proposta-alterasaun ne’e estruturada, prenxe rekizitu formál no konstitusionál tanba ne’e nesesáriu halo alterasaun.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here