Komisáriu CAC, Sérgio Hornai. Imajen Tatoli/António Gonçalves.

DILI, 19 maiu 2021 (TATOLI)—Komisaun Anti Korrupsaun (CAC siglá portugés), ezekuta ona 23.8 %, hosi Orsamentu Jerál Estadu (OJE) 2021, tuir Portál Transparénsia ne’ebé Agéncia Tatoli asesu, iha kuarta (19/05).

Nune’e, gastu orijin hamutuk $1.783.860, kompromisu $118.996.50, obrigasaun $31.270, atuál $393.629.13 no saldu $1.239.964.37.

Notísia relevante:CAC husu ezekuta OJE iha pandemia COVID-19 ho rigorozu

Komisáriu, Sérgio Hornai, hateten rezultadu ezekusaun orsamentu CAC, trimestre dahuluk ba saláriu no bens serbisu, hala’o nafatin prosesu investigasaun-sira iha atividade investigasaun kriminál.

“Orsamentu kapitál menór seida’uk ezekuta, tanba sei iha faze preparasaun prosesu administrativu,  hanesan kontratasaun hein submete aprovizionamentu atu sosa komputadór, ekipamentu diversu hodi tulun ekipa ba modernizasaun serbisu baze dadus ho inkéritu-sira,” Sergio Hornai, hateten ba jornalista Agéncia Tatoli, liu-hosi telefónika, kuarta ne’e.

Iha ezekusaun ba trimestre dahuluk, Sérgio Hornai, dehan iha dezafiu oitoan, liu-liu iha bens serbisu ho atividade dezlokasaun, iha implementasaun serka sanitária, tanba COVID-19.

Nia fó ezemplu, dalaruma delegasaun ba kazu ruma atu rona parte-sira ne’ebé ninia paradeiru iha munisípiu, difikuldade no serbisu kona-bá vizilánsia prevensaun prezensiál iha fatin-sira, hodi monitoriza dalaruma tenke iha limitasaun.

“Situasaun COVID-19, fó mós efeitu balun ba ezekusaun. Tanba ne’e, ladún gasta ba kustu dezlokasaun hanesan perdiem, kombustível no manutensaun karreta,’’ Sérgio Hornai, hateten.

Maski ho situasaun ne’e, maibé, serbisu-sira iha edifísiu, kontinua la’o nafatin hanesan notifikasaun no investigasaun kriminál.

Iha trimestre daruak, CAC ninia ezekuasaun orsamentu, primeiru sei fó prioridade ba forsa dezenvolvimentu instituisionál interna no  externa, hodi halo koordenasaun di’ak liu-tan ho instituisaun relevante-sira atu haree ba krime korrupsaun no medida prevensaun.

Segundu, dezenvolve serbisu hodi hametin medida prevensaun, dezenvolve estratejia ne’ebé sei estabelese komité ida, hola parte entidade hotu-hotu, atu haree kona-bá involvimentu sosiedade iha luta kombate korrupsaun.

Terseiru, haforsa investigasaun kriminál, kontinua liu hosi deskobre informasaun-sira ne’ebé mai hosi individu ka instituisaun relevante, hodi halo análiza no forma konkluzaun ida atu halo auto-partisipasaun iha Ministériu Públiku (MP), bainhira iha indísiu-ruma ne’ebé sufisiente no hametin delegasaun-sira ne’ebé hato’o hosi MP atu nafatin halo investigasaun.

Kuartu, kontinua halo monitorizasaun ba programa Estadu iha ámbitu COVID-19, kona-bá resposta Estadu ba sidadaun-sira hanesan Cesta Bázika no sira-seluk.

“Ida ne’e mak prioridade sira ne’ebé ita kontinua halo,’’ Sérgio Hornai, subliña.

Dotasaun OJE 2021, CAC prevee  $1.783.860, ne’ebé aloka ba sálariu no vensimentu $937.966, bens serbisu $635.019, kapitál menór $210.875 no kapitál dezenvolvimentu ho transferénsia públika laiha.

Hosi montante orsamentu ne’e, durante 2021 CAC konsentra ba programa prioridade tolu mak hanesan planu estratéjiku nasionál ba kombate korrupsaun, hametin dezenvolvimentu instituisionál no promove polítika área prevensaun no investigasaun kriminál.

Jornalista: Nelson de Sousa

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here