Komísariu CAC, Sergio Hornai. Imajen Tatoli/António Gonçalves.

DILI, 17 maiu 2020 (TATOLI)—Komisaun Antí Korrupsaun (CAC, sigla portugés) ne’ebé ho misaun halo asaun prevensaun no investigasaun kriminál iha krime korrupsaun ba kualkér forma, husu Governu rigorozu iha utilizasaun Orsamentu Jerál Estadu nian iha pandemia COVID-19.

Notísia Relevante: Relatóriu CAC ba PN, kazu abuzu podér okupa númeru dahuluk

“Ita simu rekomendasaun hosi Organizasaun Nasaun Unida nian katak Estadu parte hotu-hotu iha obrigasaun atubele halo nafatin rekuperasaun ekonómika relasaun ba iha pandemia COVID-19, maibé presiza mós rigór iha ninia ezekusaun sira atu labele fó espasu la’o sala dalan iha utilizasaun orsamentu Estadu ninian,” Komisáriu CAC, Sérgio Hornai, ko’alia kestaun ne’e bainhira aprezenta relatóriu jerál 2020 ba Parlamentu Nasionál, segunda ne’e.

Komisáriu CAC ne’e husu nafatin ba entidade hotu-hotu liuliu Parlamentu Nasionál atu junta forsa hodi kombate korrupsaun tanba maske CAC iha ona nia misaun própriu ba iha prevensaun no mós ba investigasaun kriminál ninian, maibé CAC mesak labele kombate kriminalidade korrupsaun.

Nia husu estabelese mekanizmu sistemátiku, integrada atubele kombate krime korrupsaun liuhosi forma adekuada, hanesan prosesu rekrutamentu sira, prosesu aprovizionamentu, transparénsia orsamentál no mós akuntabilidade ba iha ezekusaun orsamentu Estadu ninian, nune’e evita ema kriminozu sira tama hodi halo aat integridade Estadu nian.

Tanba ne’e, presiza mós partisipasaun ida-ne’ebé mak másimu hosi instituisaun hotu-hotu, atubele hametin no kombate korrupsaun, ne’ebé presiza luta konjunta ida ka movimentu ida ba iha kombate korrupsaun.

Onestamente, nia rekomenda ba uma fukun katak CAC presiza rekursu ida-ne’ebé sufisiente hodi alkansa serbisu sira, tanba iha Lei CAC proibidu simu osan hosi fonte sira seluk.

“Osan só bele mai de’it hosi ajénsia no mó Orsamentu Jerál Estadu ninian, nune’e evita tentativa no mós konflitu sira,” nia dehan.

Sérgio Hornai esplika, medida komisaun nian mak promove asaun prevensaun, sensibilizasaun, investigasaun kriminál iha krime korrupsaun kualkér forma, pekulatu, abuzu podér, tráfiku influénsia no partisipasaun ekonómika iha negósiu.

Nune’e mós, rekolla no halo análize informasaun relativa kauza hodi halo prevensaun ba korrupsaun, realiza asaun sensibilizasaun hodi limita prátika aktu (atos) korrupsaun, motiva pesoa adota prekausaun ka redús atos no situasaun ne’ebé fasilita okorrénsia konduta kriminoza, akonsella kualkér instituisaun ka entidade públika kona-ba forma prevene no kombate konduta korrupsaun.

CAC mós iha medida prinsipál promove asesu ba justisa, promove boa governasaun, jestaun institusionál no fortalese kapasidade rekursu umanu.

CAC hasoru dezafiu iha 2020

Komisáriu CAC ne’e fó-sai katak, iha tinan 2020 CAC hasoru dezáfiu lubuk ida hanesan menus rekursu finanseira no rekursu umanu la sufisiente, no instabilidade polítika no mós pandemia COVID-19 ne’ebé ho efeitu ne’ebé halo mós serbisu dinámika iha CAC nian kuaze la’o lentu.

Nia dehan, pandemia COVID-19 ne’e mós fó risku ba iha korrupsaun iha Timor-Leste, liuliu ba iha implementasaun ba iha polítika pandemia nian hamosu dezáfiu lubuk oan ida.

“Menus orsamentu sai hanesan kauza ka problema ida ba iha instituisaun ida-ne’e, realmente se ita ita halo relasionamentu ba pandemia ne’ebé mak iha no mós implementasaun ba iha programa polítika rekuperasaun ekonómiku iha cesta bázika nian, ho orsamentu ne’ebé uitoan defísil mós CAC atu halo espansaun ba iha monitorizasaun no móss ba iha inspensaun ninian,” nia informa.

Nia fó-sai katak, rekursu umanu ne’ebé la adekuada fó impedimentu serbisu CAC nian iha monitorizasaun ladún efisiente ka la efikaz.

Entretantu, Prezidente Parlamentu Nasionál, Deputadu Aniceto Longuinhos Guterres Lopes, rejista preokupsaun CAC nian no apresia relatóriu jerál ne’e kona-ba prevensaun no kombate korrupsaun iha Timor-Leste.

“Nu’udar órgaun lejizladór ami rejista dezáfiu sira-ne’ebé CAC hasoru hanesan rekursu umanu no rekursu finanseiru. Sura nafatin Parlamentu Nasionál nia apoiu polítiku, nune’e halibur ita hotu luta boot hasoru korrupsaun,” PPN hato’o apresiasaun ba relatóriu jerál 2020 hosi CAC nian.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here