Ministru Ensinu Superiór, Siénsia no Kultura, Longuinhos dos Santos. Imajen Tatoli/Egas Cristovão

DILI, 19 maiu 2021 (TATOLI) – Ministru Ensinu Superiór, Siénsia no Kultura (MESSK) Longuinhos dos Santos, deside ona haruka dadus provizóriu estudante benefisiáriu na’in-63,523 ba Ministériu Finansas atu prosesa pagamentu injesaun propina no internet ho fundus COVID-19.

Notísia Relevante : DJES sei elabora dadus estudante-sira atu asesu propina no pulsa internet

Ministru Longuinhos konsidera dadus sira-ne’e sei provizóriu tanba sei falta dadus ikus hosi kursu mestradu n’ebé to’o agora seidauk submete.

“Ha’u simu ona dadus sira-ne’e direita hosi Diresaun Jerál Ensinu Superiór, MESSK nian. Ha’u konsidera sei provizóriu tanba dadus ikus hosi kursu mestradu nian seidauk submete. Ha’u fó bá sira to’o lokraik tuku lima, kuandu sira la hatama, aban ba oin ha’u aprezenta ona dadus sira-ne’e ba MF hodi prosesa ona ho fundus COVID-19 nian hodi halo pagamentu ba estudante-sira,” Ministru Longuinhos dos Santos haktuir ba jornalista-sira iha Ministériu Finansas, Dili, kuarta ne’e.

Nia esplika dadus kursu mestradu ne’ebé seidauk submete hela ba faze tuir mai. Signifika, direitu ba injesaun propina no internet sei iha. Tan ne’e nia husu ba estudante kursu mestradu-sira atu submete ona dadus mai MESSK hodi haruka ba MF.

Notísia Relevante : Bolseiru-sira laiha direitu hetan tan injesaun propina

Governante ne’e akresenta molok estudante 63,523 atu hetan direitu, nia sei hasoru uluk konsellu reitór-sira sira hodi esplika asuntu injesaun propina, internet inklui liña kréditu atu sira bele intende prosesu sira ne’e.

Enfrenta dezafiu

Ministru Longuinhos dos Santos, informa tinan ne’e ministériu enfrenta dezafiu  iha ezekusaun orsamentu atu alkansa planu no programa ne’ebé trasa ona ba edukasaun ensinu superiór tanba situasaun pandemia COVID-19.

“Ami hasoru dezafiu boot atu halo ezekusaun orsamentu hodi eleva dezenvolvimentu iha edukasaun ensinu superiór,” Ministru Longuinhos dos Santos hateten.

Longuinhos esplika MESSK mak durante ne’e trata asuntu edukasaun iha Instituisaun Ensinu Superiór sira atu eleva kualidade, maibé tanba pandemia COVID-19 ezije Estadu Timor-Leste tenke kumpre estadu emerjénsia ho medida serka sanitária no konfinamentu obrigatóriu.

Situasaun ida-ne’e obriga ema hotu iha rai-laran tenke  kuidadu ho COVID-19 no la permite ema halo atividade liu na’in-10, nune’e  Ministru Longuinhos dos Santos, husu nafatin bá estudante universitáriu-sira kontinua estuda hodi dezenvolve-an no bele prodús jerasaun foun  ho kualidade iha rai doben Timor-Leste.

Jornalista  : Tomé Amado

Editór        : Francisco Simões

HAKEREK NO HATÁN

Please enter your comment!
Please enter your name here