Logotipu CAC.

DILI, 19 maiu 2021 (TATOLI)—Iha trimestre dahuluk, hahú hosi janeiru to’o marsu 2021, Komisaun Anti Korrupsaun (CAC sígla portugés), investiga kazu hamutuk 30.

“Trimestre dahuluk, ita iha kazu 30 iha investigasaun kriminál no ualu maka finaliza ona hodi remesa ba Ministériu Públiku (MP), nu’udár na’in ba asaun penal, hodi bele loke prosesu tuir-mai,’’ Komisáriu, Sérgio Hornai, hateten ba jornalista Agéncia Tatoli, via telefónika, kuarta ne’e.

Notísia relevante:OJE 2021, CAC ezekuta ona 23.8%

Komisáriu ne’e esplika, kazu 22 ninia prosesu oras-ne’e daudaun CAC kontinua halo investigasaun kle’an hodi hetan prova tanba ho kompleksidade, hafoin enkamiña ba parte relevante.

Hosi númeru kazu ho tipu krime korrupsaun, hanesan administrasaun da nosa, abuzu poder, pekulatu, partisipasaun ekonomia ho sira seluk, ne’ebé iha indísiu akontese iha liña ministeriál no instituisaun Estadu balun.

“Kazu sira-ne’e, balun ita simu delegasaun hosi MP, keixa hosi sidadaun no balun ita deskobre rasik,’’ nia hateten.

CAC mós halo koordenasaun informasaun instituisionál ho Prokuradór Jerál Repúblika (PJR), no Prokuradór titulár ba kazu ne’ebé CAC remesa daudaun ba MP, halo hela diskusaun atu bele forma konviksaun loloos, hodi bele promove akuzasaun.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here