Reuniaun Konsellu Ministru, iha salaun Ministériu Finansa, Aitarak-laran, kuarta (19/05). Imajen TATOLI/Egas Cristóvão

DILI, 19 maiu 2021 (TATOLI)—Reuniaun Konsellu Ministru (KM) iha kuarta ne’e, aprova ona Projetu Proposta Lei, ne’ebé aprezenta hosi Ministru Administrasaun Estatál (MAE), Miguel Pereira de Carvalho, ba alterasaun daneen lei númeru 7/2006, loron 28 dezembru, Lei Eleitorál ba Prezidente Repúblika.

Ministru Prezidénsia Konsellu Ministru, Fidelis Manuel Leite Magalhães, dehan, Projetu Proposta Lei ne’e hetan ona deliberasaun iha reuniaun ezekutivu iha loron 08 abríl 2021, liuliu atu introdúz alterasaun substansiál sira iha faze redasaun finál ne’ebé nesesáriu hodi submete ba deliberasaun foun hosi KM.

Notísia relevante: Alterasaun Lei Eleitorál Prezidente Repúblika garante kondisaun ba realizasaun votu

“Haree besik ona Eleisaun Prezidensiál, maka alterasaun ne’e mai ho objetivu hodi adekua ba situasaun atuál, iha kontestu pandemia COVID-19 no reforsu ba kapasitasaun ba nesesidade sidadaun sira,” Ministru Fidelis relata hafoin ramata reuniaun KM iha salaun Ministériu Finansa, Aitarak-laran.

Alterasaun ne’e mós prosede ba reforsu rekizitu formál kandidatura nian, klarifikasaun no organizasaun prosesu eleitorál inklui fasilita kondisaun ba direitu votu sidadaun sira.

Objetivu prinsipál maka atu garante katak bele iha biban ba sidadaun hotu ezerse direitu demokrátiku.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here