Abitante 100-resin ne’ebé forma hodi trata dokumentu atu hetan subsídiu iha aredór MSSI. Imajen Facebook.

DILI, 18 maiu 2021 (TATOLI)—Komandu Jerál, Polisia Nasionál Timor-Leste (PNTL), orienta ona Komandu munisípiu Dili, hodi kontrola abitante ne’ebé forma no laiha distánsia fízika iha arredór edifísiu Ministériu Solidaridade Sosiál no Inkluzaun (MSSI).

Segundu Komandante PNTL, munisípiu Dili, Superintendente Euclides Belo, konsidera abitante ne’ebé forma hodi trata dokumentu iha edifísiu MSSI,  viola regra Estadu emerjénsia no Serka Sanitária, tanba la kontrola distansiamentu sosiál, hodi prevene an hosi ameasa peste letál COVID-19 ne’ebé kontinua rejista makás iha Timor-Leste (TL).

Notísia relevante:Apoiu umanitáriu hosi Governu Australia, MSSI sei distribui ba vulnerável sira

“Ita haree sidadaun ne’ebé trata dokumentu subsídiu laiha duni distánsia no la tuir regra konfinamentu obrigatóriu. Tanba ne’e, polísia sei haruka fila bainhira kontinua hanesan ne’e,” Euclides Belo hateten ba jornalista, iha Komandu PNTL, Caicoli, tersa ne’e.

Tuir observasaun Agência Tatoli, abitante-sira forma no la kontrola distansiamentu sosiál, tanba ekipa tékniku MSSI rasik la sufisiente atu halo atendimentu ba abitante 100-resin, ne’ebé trata dokumentu atu hetan subsídiu.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here