Família no viziñu akompaña Polísia Nasionál Timor Leste (PNTL), hodi tula mate-isin Levenita Madeira ba karru funeráriu, iha rezidénsia Bebonuk ba HNGV, atu submete ba autópsia, domingu (16/05). Imajen Tatoli/Natalino Costa.

DILI, 17 maiu 2021 (TATOLI)—Família husu ba autoridade kompetente atu halo investigasaun kle’an ba kazu matebian Levenita Madeira, ne’ebé hakotu-iis iha ninia rezidénsia Babonuk, postu administrativu Dom Aleixo, munisípiu Dili, ho kondisaun tara an, iha domingu (16/05/21).

“Ami lakohi atu duun dehan ema ruma mak oho, maibé ami husu atu prosesu ne’e la’o ho di’ak,  tanba ami dúvida ho situasaun ne’ebé akontese. Instituisaun relevante-sira tenke investiga ho loloos no kle’an, nune’e ami família bele hatene motivu loloos hosi mate ne’e,” Família matebian, Brígida Soares, hateten ba jornalista-sira iha mortuáriu HNGV, segunda ne’e.

Notísia relevante:SIKN halo identifikasaun ba SEAK Teófilo Caldas

Família husu autoridade kompetente atu halo investigasaun kle’an tanba, antes ne’e família rasik asiste direta problema familiár entre matebian ho-nia kaben.

Brígida Soares konta-tuir katak, durante matebian sei moris, matebian la taka kualkér problema ne’ebé nia enfrenta, liuliu kona-bá hetan agresaun fízika (violénsia doméstika), hosi ninia kaben.

Brígida Soares nu’udár bin rasik hosi matebian konta-tuir mós katak, durante ne’e família sempre akompaña, iha duni problema entre matebian ho-nia kaben, tanba matebian deskonfia ninia-kaben iha relasaun domin ho feto seluk.

”Iha 09 maiu, matebian mai buka ami hanesan família iha Ai-mutin no esplika problema ne’e  to’o tanis, katak, nia-la’en baku no habit iha odamatan to’o liman no kotuk-laran metan hotu. Ami família telephone hodi ko’alia kona-bá ne’e, maibé nia la’en dehan hanorin imi-nia alin,” nia esplika.

Família mós foin iha komunikasaun liu hosi telefónika ho matebian-nia kaben, Teófilo Caldas iha domingu (16/05), ne’ebé dehan Levenita  Madeira save metin odamatan kuartu, durante oras barak-nia laran no la sai.

“Ha’u hatán katak, tebe rahun odamatan ne’e. Ha’u telefóne kedan ba matebian nia-oan mane maibé, la atende. Nune’e, ha’u haruka alin mane na’in-rua tun ba sobu janela no haree Levenita Madeira tara an iha almáriu,” nia subliña.

Iha fatin hanesan, Teófilo Caldas, hanesan kaben hosi matebian, lakohi fó komentáriu tanba sei hein rezultadu autopsia inklui rezultadu investigasaun.

“Ha’u labele fó kometáriu lai, tanba sei hein rezultadu autopsia no investigasaun, ne’ebé hato’o ona ba Polísia Serbisu Investigasaun Kriminál Nasionál,” Teófilo Caldas, hateten ba jornalista-sira.

To’o horisehik, matebian Levenita Madeira ho Teófilo Caldas, moris hamutuk nu’udár kaben-na’in, kompleta ona tinan 26 ho oan na’in-haat,  mane tolu feto ida.

Notísia relevante:Mate-isin espoza SEAK transporta ba HNGV hodi halo autópsia

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here