DILI, 13 maiu 2021 (TATOLI)—Tribunál Distritál Dili (TDD), hala’o primeiru interrogatóriu, ba arguidu na’in 18 ne’ebé deskonfia involve iha kazu omesídiu iha Universidade da Paz (UNPAZ), iha 22 Juñu 2020, ne’ebé rezulta Henrique Soares Maia lakon-vida.
Arguidu-sira hahú primeiru interrogatóriu, iha kinta ne’e, hafoin kumpri detensaun oras 72, iha sela Polísia Nasionál Timor Leste (PNTL), munisípiu Díli.
Notísia relevante: Kazu UNPAZ, SIKN seidauk konklui investigasaun ba suspeitu 17
Arguidu-sira kompostu hosi feto na’in-rua, no mane na’in 16 ho inisiál LSM, JCR, ZCR, GPD, JR, FPG, FTE, QB, DCA, FC, SPJ, JLF, JPS, AVC, LSX, JSC, JS no DPS ne’ebé rejistadu ho númeru prosesu NUC 0031/21.PGGCC.
Tuir loloos, aguidu-sira ne’ebé involve iha kazu ne’e, hamutuk na’in 22, maibé, foin lalais ne’e PNSIK ezekuta mandadu, konsege halo detensaun ba suspeitu na’in 18, no hela na’in-haat mak sei kontinua buka-tuir.
Durante primeiru interrogatóriu, rona ona deklarasaun hosi arguidu balun no tuir planu, aban sei kontinua rona sira-seluk.
Prosesu primeiru interrogatóriu ne’e, prezide hosi juíz, Ivan Suritay, Ministériu Públiku (MP) reprezenta hosi prokuradór, Matias Soares, no arguidu-sira hetan asisténsia legál hosi Defensór Públiku, Estaquio Guterres.
Jornalista: Nelson de Sousa
Editór: Cipriano Colo