Mapa Ataúro. Imajen/ResearchGate

DILI, 16 maiu 2021 (TATOLI)—Ekipa konjunta hosi Polísia Nasionál Timor-Leste (PNTL), Unidade Polísia Marítima (UPM) hamutuk ho FALINTIL-Forsa Defeza Timor-Leste (F-FDTL) hosi komponete Naval, kontinua buka tuir abitante haat ne’ebé mout iha tasi klaran área Berau, illa Ataúro.

Iha sábadu (15/05) ne’e, abitante na’in-hitu sai hosi portu marítima, Lecidere, maizumenus tuku 09:30 dadeer, ho ró kiik atu bá Ataúro, maibé to’o tasi klaran mout.

Nune’e, iha domingu dadeer tuku 08:00, ekipa konjunta konsege hetan abitante na’in-tolu no salva ho kondisaun di’ak, iha tasi área Cristo Rei, maibé haat seluk seidauk hetan.

“Iha vítima na’in-hitu hosi Ataúro hetan dezastre mout iha tasi klaran, maibé na’in-tolu mak konsege salva vida no dadeer ne’e to’o hikas iha área Cristo Rei no ita entrega ona ba ospitál hodi bele hetan tratamentu. Tanba ne’e, ekipa konjunta  nafatin halo operasaun hodi buka sira seluk,” Komandante UPM, Superintendente Basílio de Jesus, hateten ba jornalista sira bainhira halo hela operasaun ho ró iha tasi, domingu ne’e.

Nia dehan, bainhira simu informasaun hosi komunidade Ataúro no orden hosi Ministru Interiór, sira-nia parte  prepara kedas ekipa hodi halo operasaun.

“Desde sábadu horiseik, UPM koordena ho komponete Navál hodi halo planu konjuntu atu buka tuir vítima sira no operasaun konjunta ne’e hetan apoiu  elikopteru ida, ró marítima ida no ró navál rua,” nia informa.

Komandante UPM haktuir, informasaun ne’ebé rekolla katak ró ne’e hala’o movimentu hosi Dili bá Ataúro, ne’ebé tula ho semente saka 50, mina litru 450, inklui sasán kios balun, ho vítima na’in hitu.

Nia dehan, daudaun ne’e Timor-Leste seidauk iha regulamentu ruma hodi regula no define kuantidade sasán ne’ebé ró privadu bele tula.

“Tanba nesesidade, movimentu família lubuk ida hosi Dili-Ataúro bá-mai hosi tasi. Agora kona-ba ró nia kapasidade atu lori sasán, to’o agora laiha lei ida atu termina kapasidade ró no sasán ne’ebé sira tula. Entaun sira iha vontade tebes maski kapasidade ró la to’o atu tula sasán ho kuantidade boot, maibé tanba de’it osan ema aluga, sira la’o,” Komandante UPM esplika.

 Jornalista: Nelson de Sousa

Editora: Julia Chatarina

HAKEREK NO HATÁN

Please enter your comment!
Please enter your name here