Kondisaun uma iha área Ponte Comoro 3, Dili, ne’ebé hetan estragu hosi inundasaun ne’ebé akontese domingu (04/04/2021). Imajen TATOLI/António Gonçalves

DILI, 17 maiu 2021 (TATOLI)–Sekretaria Estadu Protesaun Sivíl (SEPS) husu ba vítima inundasaun atu halo reklamasaun ba autoridade lokál hodi rejista, nune’e bele hetan apoiu hosi Governu.

Tuir Sekretáriu Estadu Protesaun Sivíl, Joaquim José Gusmão Martins, Governu la haluha povu ne’ebé mak sofre tanba impaktu hosi inundasaun ne’ebé mak akontese fulan-abríl liubá.

“Ba sira ne’ebé seidauk hetan apoiu, iha tempu atu halo reklamasaun, bele hakbesik ba xefe suku no aldeia sira nune’e tama iha lista reklamasaun. Governu sei la husik ida iha kotuk, katak hotu-hotu tenke hetan direitu hanesan hanesan komunidade afetadu hosi dezastre naturál ne’ebé akontese,” Sekretáriu Estadu relata hafoin ramata reuniaun ho Primeiru-Ministru, Taur Matan Ruak, iha Rezidénsia Farol, segunda ne’e.

Notísia relevante: Governu lansa transportasaun apoiu umanitáriu ho elikópteru ba Ataúro

Governante ne’e dehan, vítima 50% mak hetan ona ajuda no iha munisípiu kuaze apoia hotu ona.

“Ita agradese tanba iha elikóptru ne’ebé mak ajuda ona SEPS hodi transporta apoia sira ba iha fatin sira ne’ebé dalan kotu inklui mós postu administrativu Ataúro,” nia akresenta.

Relasiona ho asuntu apoia umanitária dezastre naturál, maka Sekretáriu Estadu hamutuk ho ekipa hasoru malu ho Xefe Governu hodi relata kona-ba situasaun iha terrenu.

“Serbisu ne’ebé relata maka progresu apoiu ba komunidade afetadu sira, ne’ebé dadus ba komunidade afetadu kada loron aumenta tanba iha fatin balun ita la konsege to’o no foin mak simu hosi autoridade lokál sira,” nia hatutan.

Notísia relevante: Apoiu vítima dezastre naturál hotu konsentra iha SEPS

Durante ne’e SEPS simu apoia hosi entidade hamutuk 45, kompostu hosi embaixada sira, ajénsia Nasaun Unida, Organizasaun Naun Governamentál (ONG) internasionál, individuál, no sira ne’ebé fó liuhosi sentru reparasaun ba jestaun risku dezastre iha SEPS, hafoin kanaliza hotu ba komunidade.

Iha mós apoiu fundu mai hosi Cruz Vermella Xina $100.000, asosiasaun empreza xineza $15.000, no funsionáriu Embaixada Tailándia iha Timor-Leste kontribui $2.500.

Jornalista: Antónia Gusmão

Editora: Julia Chatarina  

HAKEREK NO HATÁN

Please enter your comment!
Please enter your name here