Elikópteru hosi kompañia aviasaun MCDERMOTT Austrália ho númeru N365JA iha Aeroportu Comoro. Imajen Tatoli/António Gonçalves.

DILI, 22 abríl 2021 (TATOLI)—Governu liu hosi Sekretária Estadu Protesaun Sivíl (SEPS), lansa transportasaun apoiu umanitáriu dahuluk ho elikópteru ba Postu Administrativu Ataúro, Munisípiu Dili.

“Ita halo lansamentu dahuluk voo ho elikópteru hodi transporta apoiu emerjénsia ba Ataúro,” SEPS, Joaquim Gusmão, hateten ba jornalista-sira iha Aeroportu Internasionál Prezidente Nicolau Lobato, Comoro, kinta ne’e.

Notísia relevante:Austrália ho Santos apoiu elikópteru hodi reforsa ajudu umanitáriu

SEPS hili Ataúro ba transportasaun dahuluk tanba konsidera área izolada, no tuir planu, sei halo oráriu ida hodi bele transporta ba fatin sira-seluk ne’ebé Governu deteta ona.

Sasán ne’ebé tula ba Ataúro mak hanesan foos, mina bimoli, super mie, susu-been, biskuit no seluk-tan atu oferese ba família 100 ne’ebé afetada ba dezastre naturál iha 04 abríl.

“Voo dahuluk ne’e tula uluk foos saka 35 ho ema na’in-rua hodi koko aviaun ho klima. Bainhira sente normál, sei tula ho sasán to’o tonelada ida,” Joaquim Gusmão esplika.

Entretantu, Governu Austrália ho kompañia petrolífeira Santos aluga aviaun elikópteru ne’e hosi kompañia aviasaun MCDERMOTT Austrália, hodi bele fó apoiu ba Governu TL durante fulan ida to’o maiu nia rohan, atu bele fasilita mobilizasaun ajudu umanitáriu ba populasaun ne’ebé la asesu ba estrada iha territóriu.

Tuir akordu, utilizasaun ba aviaun ne’e kada loron sei semo oras haat, hodi halo asisténsia umanitária.

Elikópteru ne’e ho kapasidade bele tula ema na’in-ualu no sasán tonelada ida ne’ebé bele tara de’it.

Tuir dadus ne’ebé SEPS  identifika iha Munisípiu Dili, iha família 9.000 mak presija apoiu emerjénsia.

Hosi númeru ne’e, to’o 19 abríl iha família 5.323 mak simu ona apoiu no SEPS kontinua distribui ba sira-ne’ebé seidauk hetan.

SEPS mós re-aloka ona sasán apoiu emerjénsia hosi nasionál ba Munisípiu-sira ne’ebé estok menus, hodi bele distribui ba família-sira.

Dadus ofisiál hosi Governu liu hosi Ministériu Administrasaun Estatál (MAE), provizoriamente iha família 25.207 mak  afetada ba inundasaun iha territóriu.

Ekipa MAE, SEPS no seluk-tan kontinua halo levantamentu hodi identifika kategoria estragu natón, kamán no aat-totál atu bele hetan apoiu rekoperasaun.

Notísia relevante:SEPS sei transporta apoiu emerjénsia ba Ataúro ho elikópteru

Jornalista: Nelson de Sousa

Editór: Cipriano  Colo

HAKEREK NO HATÁN

Please enter your comment!
Please enter your name here