Prizioneiru-sira iha prizaun Becora, transfere ba Prizaun Suai, iha 01Setembru 2019. Imajen/António Gonçalves.

DILI, 17 maiu 2021 (TATOLI)—Ministru Justisa (MJ), Manuel Cárceres da Costa, husu ba Ministéiru Saúde (MS), atu bele oferese vasina kontra COVID-19, ba prizioneiru no guarda prizionál-sira iha prizaun Becora, Suai no Gleno.

“Primeiru Ministru fó ona orientasaun mai ha’u, atu ko’alia ho Ministériu Saúde, hodi fó vasina ba maluk sira iha prizaun, nune’e bele aumenta imunidade kontra COVID-19,’’ Manuel Cárceres, hateten ba jornalista-sira, hafoin sorumutu ho Xefe Governu, Taur Matan Ruak iha rezidénsia Faról, segunda ne’e.

Notísia relevante:Semana ne’e, deteta pozitivu COVID-19 hamutuk 37 iha prizaun Suai

Manuel Cárceres hateten, durante enkontru ho Primeiru Ministru,  aprezenta katak, to’o oras ne’e iha prizaun Gleno seidauk deteta infetadu COVID-19, nune’e tuir planu Ministériu Saúde sei hala’o teste swab ba prizioneiru-sira iha prizaun Gleno.

“Aban parte saúde sei ba halo teste swab iha prizaun Gleno,’’ nia informa.

Tuir dadus, oras-ne’e daudaun prizaun Becora iha prizioneiru hamutuk 541 ho guarda prizionál 133, prizaun Suai iha prizioneiru 101 no guarda prizionál 40, prizaun Gleno iha prizioneiru 117  no guarda prizionál 35.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here