Ilustrasaun COVID-19. Imajen/Espesiál

DILI, 16 maiu 2021 (TATOLI)—Iha semana ne’e nia laran, ekipa saúde deteta tan kazu pozitivu COVID-19 hamutuk 37 (reprezenta 26,2%) hosi totál populasaun prizionál hamutuk 103 ho guarda prizionál 28, iha prizaun Suai.

Antes ne’e, iha loron sesta (14/05), Sala Situasaun-Sentru Integradu Jestaun Krize (SS-CIGC, sigla portugés) rejista kazu pozitivu COVID-19 hamutuk 239, rekuperadu na’in-86 no kazu ativu 1.968.

Hosi kazu 239 detetadu, 77 hosi prizaun Becora, ne’ebé hamutuk hosi kinta (13/05) to’o sesta, iha detetadu kazu pozitivu hamutuk 220 hosi populasaun prizionál 557 (reprezenta 39,5%.).

Notísia relevante: Prizioneiru ne’ebé pozitivu COVID-19 izola iha prizaun Becora

Maski nune’e, dadur sira ne’ebé detetadu pozitivu iha prizaun nafatin izola-an iha fatin ketak iha prizaun, ne’ebé hetan akompañamentu másimu hosi ekipa saúde.

Haree ba evolusaun kazu COVID-19 kada loron, Koordenadór Forsa-Tarefa ba Prevensaun no Mitigasaun Surtu COVID-19 iha Timor-Leste, hosi CIGC-SS, Rui Maria de Araújo, apela ba públiku hodi kontaktu ba númeru hotline bainhira hetan sintoma no hakarak halo teste Polymerase Chain Reaction (PCR).

“Bele uza númeru hotline 119 hodi kontaktu  ekipa operasionál iha Ministeriu Saúde, hanesan hakarak halo swab ba teste PCR, bele kontakta hafoin ema ne’ebé atende telefone sei enkamiña ba ekipa vijilánsia epidemiolójika hodi bele organiza. Nune’e mós bainhira iha dúvida ka presiza atendimentu ruma relasiona ho surtu COVID-19, halo favór liga ba 119,” Koordenadór hateten liuhosi nota ne’ebé Agência Tatoli asesu, domingu ne’e.

Nia dehan, bainhira hetan sintoma hanesan isin-manas, mear, kakorok moras ka sintoma seluk tan bele ba konsulta iha sentru Saúde ne’ebé besik, atubele halo swab no  bainhira atu husu autorizasaun exesionál sai hosi serka sanitaria iha Dili, bele ba halo swab iha Sentru Konvensaun Dili (CCD, sigla portugés).

Nune’e mós, bainhira sente katak iha  kontaktu besik ba ema ruma ne’ebé detetau pozitivu COVID-19 no seidauk hetan kontaktu hosi ekipa konjunta saúde, bele liga ba numeru 119 atu organiza teste swab ho ekipa Saúde na Familia (SnF) iha sentru saúde sira iha Dili.

Aleinde ne’e, ekipa saúde sei halo mós vizita ba bairru ho aldeia sira ne’ebé detetadu kazu barak ona no iha sintoma ka sente kontaktu besik ho kazu pozitivu ruma.

 Jornalista: Nelson de Sousa

Editora: Julia Chatarina

HAKEREK NO HATÁN

Please enter your comment!
Please enter your name here