Polísia hiit mate-isin Levenita Madeira hodi halo autópsia iha HNGV, domingu (16/05). Imajen/Natalino Costa

DILI, 16 maiu 2021 (TATOLI)—Levenita Madeira, hanesan espoza Sekretáriu Estadu Arte no Kultura (SEAK), Teófilo Caldas, hakotu iis tanba tara-an iha domingu dadeer ne’e, maizumenus tuku 08:00, iha rezidénsia aldeia 20 de Setembro, suku Bebonuk, postu administrativu Don Aleixo, munisípiu Dili.

Seidauk hatene motivu hosi akontesimentu ne’e, maibé tuir observasaun Agência Tatoli iha terrenu, nota katak ekipa Forense Polísia Investigasaun Kriminál Nasionál rekolla ona evidénsia sira no lori ona mate-isin ba Hospital Nasional Guido Valadares (HNGV) hodi submete ba autópsia, akompaña hosi ema na’in-neen besik matebian inklui nia kaben rasik, Teófilo Caldas, hodi bele hatene kronolojia loloos.

Família no viziñu akompaña Polísia lori mate-isin Levenita Madeira, hosi rezidénsia Bebonuk ba HNGV hosi halo autópsia, domingu (16/05). Imajen/Natalino Costa

Oan mane boot hosi matebian, Telesiano Caldas, haktuir, hafoin tara-an, matebian konsege komunika ho nia oan mane boot ho kondisaum di’ak hela, maibé derepente de’it hakotu iis.

“Horikalan ama haruka aban tenke hadi’a bei-oan nia rate no ohin nia hakotu iis tanba tara-an,” Telesiano Caldas, dehan ba Agência Tatoli, iha rezidénsia Bebonuk, domingu ne’e.

Iha rezidénsia matebian, nota mós katak akontesimentu ne’e iha kuartu laran, matebian kesi tali metru rua iha armáriu ba nia kakorok, halo labele dada-iis no hakotu iis iha fatin.

Matebian hakotu iis ho idade 38 no husik oan na’in-haat ho espozu, Sekretáriu Estadu Arte no Kultura, Teófilo Caldas.

Iha terrenu, família no viziñu hahú mai barak no hatudu sira nia sentimentu triste.

Jornalista: Natalino Costa/Nelson de Sousa

Editora: Julia Chatarina

HAKEREK NO HATÁN

Please enter your comment!
Please enter your name here