Adjuntu Komisáriu CAC ba Asuntu Prevensaun no Sensibilizasaun, Luis de Oliveira Sampaio. Imajen Tatoli/Egas Cristóvão.

DILI, 17 maiu 2021 (TATOLI)—Komisaun Anti Korrupsaun (CAC-siglá portugés), haruka ona  karta ba liña ministéiru no instituisaun autónomu-sira, hodi halo arrolamentu ba kargu xefia, ba prosesu deklarasaun riku-soin no bens interese.

“Ita haruka hotu ona notifikasaun ba ministéiru-sira, ba prosesu arrolamentu dadus,” Adjuntu Komisáriu CAC ba Asuntu Prevensaun no Sensibilizasaun, Luis Oliveira Sampaio, hateten ba jornalista Agéncia Tatoli, via WhatsApp, segunda ne’e.

Notísia relevante:Deklara riku-soin, CAC suspende arrolamentu ba kargu xefia

Liu hosi karta ne’e, husu ba diresaun rekursu umanu ministériu ida-idak, atu rekolla dadus kargu xefia no funsionariu ne’ebé sai responsável iha área reseita hodi aprezenta fila-fali lista ba parte CAC.

CAC sei anexa mós ho formuláriu manuál arrolamentu, hodi prienxe deklarante ho agregadu familiár, no CAC rekolla hodi hatama dadus iha sistema.

Oras-ne’e daudaun, CAC koordena ona ho Tribunál Rekursu (TR), ho Ajénsia Teknolojia Informasaun no Komunikasaun (TIC-siglá portugés) Timor, Institutu Públiku,  atu bele dezeña prosesu tékniku sistema formuláriu ba deklaras aun liu hosi meiu dijitál.

Tuir lei, sistema iha forma rua mak hanesan dijitál no konvensionál, tanba ne’e CAC prefere kria sistema eletróniku ne’ebé daudaun prosesu la’o hela tanba sistema ne’e sei asegura deklarante-sira.

Kona-bá prosesu arrolamentu dadus ba pesoál ne’ebé instituisaun ida-idak sei aprezenta, CAC sei efetua serbisu ba instituisaun hira mak arroladu, hodi sujeita atu halo deklarasaun.

Tanba ne’e, bainhira konklui arrolamentu ba dadus pesoál hosi instituisaun sira, CAC sei define mapeamentu kona-bá instituisaun hira mak aplika uluk hodi deklara riku-soin.

Lei númeru 7/2020, 26 agostu kona-bá Medida Prevensaun no Kombate Korrupsaun (MPKK), tama ona iha vigór iha 22 fevereiru tinan ne’e.

Lei MPKK ne’e prevee iha kapitulu II Regime de Declaracão de Rendimentos, Bens e Interesses hosi artigu 27 to’o artigu 58.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here