Ministra Saúde (MS), Odete Maria Freitas Belo, hamutuk ho Ministru Justisa (MJ), Manuel Cárceres da Costa haree direta kondisaun prizaun Becora, sesta (14/05/21). Imajen Tataoli/Felicidade Ximenes.

DILI, 14 maiu 2021 (TATOLI)—Ministra Saúde (MS), Odete Maria Freitas Belo, hateten dadur-sira ne’ebé detetadu pozitivu COVID-19, sei halo izolamentu iha prizaun Becora.

”Sira halo izolamentu iha sira-nia fatin no sei la sai ba fatin seluk,” Odete Maria Freitas Belo, hateten ba jornalista-sira bainhira hamutuk ho Ministru Justisa (MJ), Manuel Cárceres da Costa haree direta kondisaun prizaun Becora, sesta ne’e. 

Notísia relevante:Dadur 556 iha Prizaun Becora ho kondisaun seguru

Nia esplika, Governu iha obrigasaun atu haree situasaun ne’e hodi tau-matan, tanba haree ba kondisaun ida-ne’e katak, alende COVID-19, prizioneiru-sira mós sofre moras seluk.

“Tanba ne’e mak ami mai haree atu komunika ho guarda prizonál-sira, hodi haree sira ne’ebé asintomátiku tau ketak. Maibé, ita tau atensaun ba sira ne’ebé laiha síntoma, maibé sofre hela mós moras seluk, nune’e mós sira ne’ebé iha síntoma maibé iha moras seluk ho idade 60 ba leten, ita hakarak asegura,” Odete Beleo, esplika.

Tuir lista ne’ebé parte saúde iha katak, prizioneiru-sira ne’ebé pozitivu kuaze laiha síntoma, entaun  MS rasik iha esperansa katak, sira bele dezenvolve sira-nia kondisaun bele rekopera lalais.

Iha fatin hanesan, Ministru Justisa, Manuel Cárceres da Costa, hateten guarda prizionál  na’in-sia pozitivu, inklui prizioneiru-sira seluk.

”Ministra Saúde haree ona fatin atu izola sira, transforma de’it sela ne’e sai sentru izolamentu COVID-19, ba ita-nia maluk dadur sira,” Manuel Cárceres, informa.

Ohin, Sala Situasaun Sentru Integradu Jestaun Krize (SIJK), rejista kazu pozitivu COVID-19 hamutuk 239, rekoperadu na’in 86 no kazu ativu 1.968.

Hosi kazu 239 detetadu ohin, 77 hosi kadeia Becora. Hamutuk hotu hosi horisehik mai ohin, iha Kadeia Becora detetadu kazu pozitivu 220, hosi populasaun prizionál 557 (taxa atake 39,5%.).

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here