Sentru izolamentu Vera Cruz. Imajen TATOLI/Egas Cristóvão.

DILI, 16  maiu 2021 (TATOLI)—Família foti ona mate-isin Filipe Ramos hosi izolamentu Vera Cruz, iha tuku 12:40 no lori deskansa minutu balun iha rezidénsia Kintál-boot, Dili, hafoin transporta mate-isin ba moris fatin, postu administrativu Lospalos, munisípiu Lautém.

“Família kolobora ho parte Governu liuhosi Sala Situasaun-Sentru Integradu Jestaun Krize (SS-CIGC, sigla portugés) ba prosesu funebre atu la’o tuir nafatin regra Organizasaun Mundiál (OMS) no Ministériu Saúde,” Koordeandor Pilar I hosi SS-CIGC, Narsizo Fernandes, hateten ba jornalista sira  iha izolamentu  Vera Cruz, domingu ne’e.

Notísia relevante: Rezultadu Laboratóriu, Filipe Ramos mate ho COVID-19

Iha sábadu (15/05), Filipe Ramos (56) hakotu iis iha nia serbisu fatin, iha ofisina Diamons Workshop, Fatuhada, Dili.

Hafoin akontesementu, ekipa vijilánsia epidemiolojia tun ba fatin akontesimentu hodi halo negosiasaun ho família, nune’e konsege konvense hodi halo teste swab ba matebian no rezultadu hosi Laboratóriu Nasionál (LABNAS) sai iha tuku 14:00 no hatudu matebian pozitivu COVID-19.

Haree ba rezultadu laboratóriu, família konkorda ho ekipa SS-CIGC hodi lori mate-isin Filipe Ramos ba sala izolamentu.

Prosesu transporta mate-isin ba Lautém akonpaña mós hosi parte SS-CIGC no MS hodi haloot tuir protokolu saúde.

 Jornalista: Nelson de Sousa

Editora: Julia Chatarina

HAKEREK NO HATÁN

Please enter your comment!
Please enter your name here