Coveiru-sira hatama hela matebian Filipe Ramos ba kaixaun. Imajen Tatoli/Antónia Gusmão

DILI, 15 maiu 2021 (TATOLI)-Purvolta tuku 11:00 Otl, Pilár III ne’ebé responsabiliza ba iha vijilánsia epidemolojia no investigasaun kazu, simu kontaktu hosi hotline 119 katak abitante ida ho naran Filipe Ramos (56) hosi Munisípiu Lautem servisu iha ofisina DIAMOND WORKSHOP-Fatuhada, Dili, mate derrepente iha ninia kna’ar fatin.

Notísia Relevante : COVID-19: sasin hosi pasiente rekoperadu iha Vera Cruz

“Iha tuku 11:00 Otl, ami hosi pilár III ne’ebé responsabiliza ba iha vijilánsia epidemolojia no investigasaun kazu, simu kontaktu hosi hotline 119 katak iha abitante ne’ebé servisu iha ofisina DIAMOND WORKSHOP ataka no monu mate iha fatin, nune’e ha’u organiza ekipa hodi tun ba fatin akontesimentu, ami halo negosiasaun ho família, nune’e konsege konvense família hodi halo teste swab ba matebian no rezultadu sai iha tuku 14:00 Otl, hosi  Laboratóriu Nasionál (LabNas) katak matebian pozitivu COVID-19, signifika matebian mate ho COVID-19,” koordenadór Vijilánsia Epidemiolojia MS, Carlito Correia Freitas, hateten iha fatin akontesimentu, Fatuhada, Dili, sábadu ne’e.

Nia hatutan, ho rezultadu LabNas nian, maka kontaktu ba pilár I no sira ne’ebé responsabiliza ba prosesu óbitu hodi realiza prosesu funerál.

“Informasaun ne’ebé mak ami simu hosi família matebian katak matebian moras fuan no dala ruma hemu bee-malirin halo estómagu atrapalla uitoan no ami to’o iha fatin ne’e iha duni bee-malirin aqua ida mak hatuur duni iha nia sorin, más ne’e istória de’it maibé haree fali ba rezultadu teste hatudu katak matebian infetadu COVID-19,” atuál Diretór Nasionál Saúde Públiku MS ne’e haktuir.

Iha fatin hanesan Inacio de Araújo Alves nu’udar sasin haktuir nia bolu matebian maibé la hatán nune’e rona ba kalén tarutu nune’e nia hakbesik ba haree matebian duni mak monu.

“Kolega ida haruka ha’u atu bolu matebian, no ha’u mós bolu, maibé nia (matebian) la hatán no ha’u kontinua fase ha’u nia faru, ha’u fase hotu ha’u rona kalén ka fatin ne’ebé pinta karreta sira ne’e tarutu, nune’e ha’u loke ba matebian toba hela no nia husu ha’u atu futi bee fó ba nia hemu maibé tanba ha’u ta’uk no ha’u bolu tan kolega ida mai no nia nafatin husu bee  ne’ebé ami fó ba nia hemu, maibé foin hakmumuk de’it, no nia tafui entaun nia haruka tan ha’u foti balde para nia muta ne’ebé nia muta tiha duni, entaun ami-nia patraun feto haruka ami ba bolu nia família ne’ebé ha’u ba duni bolu nia oan mane-boot mak mai, ami to’o iha fatin matebian is laiha tiha ona,” Inacio  haktuir.

Matebian servisu nu’udar pintór iha ofisina DIAMOND WORKSHOP, matebian hosi Munisípiu Lautem no rezidénsia atuál iha Kintál-Boot.

Hafoin negosiasaun entre ekipa Sala Situasaun, Sentru Integradu Jestaun Krize (SS-CIGC, sigla portugés) ikus mai lori duni mate-isin ba rai iha sala izolamentu Vera Cruz, nune’e hein rezultadu teste swab ba família matebian nian sai iha aban (domingu) maka transporta matebian ba haloot iha ninia rai moris fatin Lautem tuir protokolu COVID-19 maibé antes lori ba Lautem sei liuhosi ninia uma iha Kintál-Boot.

Jornalista       : Antónia Gusmão

Editór             : Francisco Simões

HAKEREK NO HATÁN

Please enter your comment!
Please enter your name here