Sentru izolamentu Vera Cruz. Imajen Tatoli/Egas Cristóvão.

DILI, 16 maiu 2021 (TATOLI)–Sala Situasaun-Sentru Integradu Jestaun Krize (SS-CIGC, sigla portugés), iha domingu ne’e rejista tan kazu óbitu (mate) pasiente COVID-19 na’in-rua, nune’e totál kazu óbitu ne’ebé rejistadu to’o ohin loron hamutuk sanulu.

Koordenadór Forsa-Tarefa ba Prevensaun no Mitigasaun Surtu COVID-19 iha Timor-Leste, hosi CIGC-SS, Rui Maria de Araújo, hateten, kazu óbitu ida, mane ho idade 56 no hela iha Santa-Crúz.

“Horiseik loron 15  maiu, maizumenus iha tuku 11:00 dadeer, iis kotu iha serbisu fatin iha Fatuhada, nune’e parte maluk serbisu sira informa ekipa vijilánsia epidemiolójika no ho autorizasaun família halo teste swab post portem iha tuku 11:31, ho rezultadu hatudu pozitivu ho Cycle Threshold (CT) N gene 33,4, E gene 31,2,” Koordenadór esplika liuhosi nota komunikadu ne’ebé Agência Tatoli asesu, domingu ne’e.

Notísia relevante: Família deside mate-isin Filipe Ramos haloot iha Lautém

Nune’e, família deside atu lori ba hakoi iha Lautém no kumpre protokolu COVID-19 tuir Organizasaun Munidiál Saúde (OMS) no Ministéiru Saúde (MS).

“Tuir informasaun hosi família, matebian iha istória tensaun a’as no la kontrola regularmente,” nia akresenta.

Enkuantu kazu óbitu seluk, mane ho idade 58, sidadaun xinés, hela iha Comoro, ba iha Hospital Nasional Guido Valedares (HNGV) iha 11 maiu ho isin manas maka’as, hafoin diagnostikadu Sindroma Insufisiénsia Respiratória Aguda (SIRA) ka susar dada-iis no deteta SARS-CoV2 ho CT N gene 27,1, E gene 24,9.

“Hahú kedas kalan ne’e, halo tratamentu iha fatin izolamentu Vera Crúz no horiseik lorokaik iis kotu, tanba fallansu respiratóriu (respiratoric failure) ho multiple organ failure,’’ nia subliña.

Nia hatutan, ba sidadaun estranjeiru ne’e, família ho Embaixada Xina koordena hela ho ekipa CIGC-SS atu halo kremasaun.

Jornalista: Nelson de Sousa

Editora: Julia Chatarina

HAKEREK NO HATÁN

Please enter your comment!
Please enter your name here