Tabela evolusaun surtu COVID-19 iha Timor-Leste, hosi 21 marsu 2020 to’o 16 maiu 2021, tuir klasifikasaun transmisaun OMS. Imajen/SS-CIGC

DILI, 16 maiu 2021 (TATOLI)—Sala Situasaun-Sentru Integradu Jestaun Krize (SS-CIGC, sigla portugés) rejista kazu pozitivu COVID-19 iha domingu ne’e hamutuk 179, rekuperadu 65 no totál kazu ativu ne’ebé baixa iha sentru izolamentu hamutuk 2.116.

“Hosi kazu detetadu foun ohin hamutuk 179, kompostu hosi iha Dili 156 no munisípiu seluk 23. Hosi totál ne’e mane 98 no feto 81 no hirak ne’ebé idade 12 mai kraik iha na’in-haat, idade entre 12-59 iha na’in-170 (reprezenta 94,9%) no idade 60 ba leten iha na’in-neen,” Koordenadór Forsa-Tarefa ba Prevensaun no Mitigasaun Surtu COVID-19 iha Timor-Leste, hosi CIGC-SS, Rui Maria de Araújo, informa liuhosi nota komunikadu ne’ebé Agência Tatoli asesu, domingu ne’e.

Notísia relevante: COVID-19: SS-CIGC rejista tan kazu óbitu rua

Kazu detetadu ohin loron, proporsaun sintomátiku hamutuk 12,2% no 87,8% hanesan asintomátiku (laiha sintoma maibé ho teste pozitivu).

Nune’e, totál kazu kumulativu hahú sura hosi 21 marsu 2020 to’o ohin loron hamutuk 4.458.

Hosi horiseik to’ ohin, Laboratóriu Nasionál Saúde halo teste Polymerase Chain Reaction (PCR) iha Dili hamutuk 781, kompostu hosu vijilánsia sentinela hitu, rastreiu ba kontaktu (contact tracing) 151, rastreiu aleatoriu (random screening) 179, viajen sai hosi serka sanitária munisípiu Dili 420, viajen internasionál 19 no follow up iha kuarentena lima.

Totál teste PCR ne’ebé halo iha loron 15 maiu, iha munisípiu sira no Hospital Nasional Guido Valadares (HNGV) hamutuk 365, kompostu hosi Baucau 70, Ermera 11, Maliana 27, Maubisse 49, Rejiaun Administrativa Espesiál Oé-cusse Ambeno (RAEOA) ida, Suai 53, Viqueque 62 no HNGV 92.

Iha izolamentu Vera Cruz halo tratamentu ba kazu detetadu na’in-31 iha área obstetrisia na’in-13 no iha medisina interna na’in-18.

“Sira na’in 13-iha obstetrisia ho kategoria moderadu hotu, sira-nia kondisaun estável no hosi sira na’in-18 iha medisina interna ida krítiku no uza ventiladór, ida  grave uza CPAP, na’in-12 moderadu,” Koordenadór haktuir.

Jornalista: Nelson de Sousa

Editora: Julia Chatarina

HAKEREK NO HATÁN

Please enter your comment!
Please enter your name here