Tenda ne’ebé SEPS harii ba família afetadu inundasaun iha área Masin Lidun, sesta (14/05/21). Imajen Tatoli/Nelson de Sousa.

DILI, 15 maiu 2021 (TATOLI)—Sekretária Estadu Protesaun Sivíl (SEPS), harii tenda ba família hamutuk 47 iha bairru Masin Lidun, aldeia 12 Outubru, suku Comoro, postu administrativu Dom Aleixo, munisípiu Dili.

SEPS, Joaquim Gusmão, hateten tuir pedidu hosi autoridade bairru katak, família hirak-ne’e presiza duni apoiu, tanba uma bee nalihun no to’o oras-ne’e seida’uk maran, nune’e parte protesaun sivíl deside hodi fó apoiu harii tenda.

Notísia relevante:Austrália apoiu tenda 220 ba vítima dezastre naturál iha Timor-Leste

Tenda hirak-ne’e, protesaun sivíl hetan apoiu hosi Governu Austrália, liu hosi Embaixada iha Dili hamutuk 220, ne’ebé distribui ona balun ba komunidade iha Manleuana no Metinaro.

“Nesesidade ne’ebé iha, harii mós tenda 47 ba família iha Masin Lidun, hodi bele utiliza ho provizóriu,’’Joaquim Gusmão, hateten bainhira hala’o vizita ba família afetadu iha Masin Lidun, sesta ne’e.

Nia mós agradese ba parseiru ne’ebé hamahan an iha Australia Patnership Humanitarian (AHP), hodi serbisu hamutuk ho SEPS, bele harii tenda hirak-ne’e.

Iha vizita ne’e, SEPS mós oferese kulxaun, muskiteiru ho lampu solár ba komunidade, hodi bele utiliza iha tenda ne’ebé harii ona.

Iha fatin hanesan, reprezentante Embaixada Austrália iha Dili, Troy Skaleskog, afirma, Austrália prontu fó apoiu Timor-Leste iha situasaun kalamidade, liu hosi AHP ne’ebé desde inisíu halo intervensaun lubuk ida, hodi apoia vítima dezastre naturál.

Maria Gomes nu’udár komunidade agradese ba apoiu Governu-nian, hodi bele hakmán sira iha situasaun difísil.

Tuir dadus hosi autoridade bairru Masin Lidun, iha família vítima inundasaun hamutuk 2.007.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here