Aviaun My Jet Xpress Airlines transporta apoiu hosi Governu Austrália liuhosi kooperasaun servisu ho World Food Programme (WFB) to’o iha Aeroportu Internasionál Prezidente Nicolau Lobato. Imajen/Mídia SEPS.

DILI, 08 maiu 2021 (TATOLI)—Governu Austrália fó apoiu tenda hamutuk 220 ba Governu Timor-Leste hodi bele fó apoiu ba vítima dezastre naturál ne’ebé akontese iha domingu 04 abril 2021.

Notísia Relevante: Austrália reitera apoiu Timor-Leste iha ámbitu COVID-19 no dezastre naturál

Apoiu ne’e transporta hosi Malázia mai Timor-Leste ho Aviaun My Jet Xpress Airlines to’o iha Aeroportu Internasionál Prezidente Nicolau Lobato tuku 14:30 ne’ebé oferese liuhosi kooperasaun servisu ho Organizasaun Internasional World Food Programme (WFP) ne’ebé nia baze iha Malázia.

Iha biban ne’e, Diretór Jerál Sekretariu Estadu Protesaun Sivíl, Superintendente Ismael da Costa Babo hato’o agradese ba Governu Astrália nia apoiu hosi tulun vitima dezastre naturál.

“Lori Governu nian naran hato’o agradese ba Governu Austrália nia apoiu. Tanba, tenda 220 ne’e ita sei fó prioridade hodi fahe ba ita-nia vítima dezastre naturál ne’ebé mak sira-nia uma estraga total total. Ita sei halo distribuisaun ba sira bele fila-fali ba sira-nia hela fatin to’o hein rekuperasaun ba sira tuir dadus ne’ebé ita rekolla ona,” Ismael Babo hateten ba jornalista sira iha Aeroportu Comoro, Dili, sábadu ne’e.

Molok halo destribuisaun tenda ne’e, nia dehan, ekipa tékniku hosi World Food Programme (WFP) sei fó formasaun téknika ba ekipa téknika Sekretariu Estadu Protesaun Sivil (SEPS) hodi fasilita monta tenda hirak ne’e ba vitima afetadu sira.

Tenda hirak ne’e, tuir planu Governu nian sei oferese ba vitima inundasaun ne’ebé sira-nia uma hetan estragá totál ne’e hamutuk 500-resin.

“Ita fó prioridade vítima sira ba Dili. Resin karik mak ita sei fó apoiu to’o ba munisípiu sira, tanba tenda ne’e 200-resin de’it no uma estraga iha Dili ne’e kuaze 500-resin tiha ona. Ita espera katak 500 ne’e seidauk bele kobre lona 200-resin ne’e. Maibé, ita halo jestaun oinsá fó prioridade ba sira-ne’ebé mak labele duni iha kondisaun mak bela hetan tenda sira-ne’e,” Ismael Babo hateten.

Tuir dadus prelimináriu ba dezastre naturál iha teritóriu Timor-Leste ne’ebé Ajénsia Tatoli rekolla, ema na’in 41 lakon vida, família afetadu 21. 676 no dezlokadu 7.246 iha sentru akollamentu 31, ne’ebé ho kustu estimasaun kuaze millaun $50 ba sidadaun sira-nia sasán no uma de’it.

Jornalista: Eugénio Pereira

Editór: Cancio Ximenes

HAKEREK NO HATÁN

Please enter your comment!
Please enter your name here