Pasiente rekoperadu COVID-19, Lourenço de Oliveira, bainhira baixa iha sentru izolamentu Vera Crus. Imajen/espesiál.

DILI, 14 maiu 2021 (TATOLI)–Pasiente pozitivu COVID-19, Lourenço de Oliveira, ne’ebé rekopera hosi sentru izolamentu Vera Cruz, fó-sasin katak, peste letál COVID-19 iha duni.

Tanba ne’e, Lourenço de Oliveira, husu ema hotu-hotu atu kuidadu an no tenke kumpre regra saúde públika kona-bá prevensaun COVID-19.

Notísia relevante:COVID-19: sasin hosi pasiente rekoperadu

“Ho grasa Maromak-Nian no intervensaun hosi profisionál pesoál saúde, ohin ha’u rekopera hosi moras ne’e,” Lourenço de Oliveira, hateten ba jornalista-sira iha rezidénsia, Dili, sesta ne’e.  

Liu-hosi konferénsia imprensa, Lourenço de Oliveira fó-sasin katak, durante loron 14 baixa iha izolamentu Vera Cruz, hamutuk ho pasiente pozitivu COVID-19-sira seluk, hetan atendimentu di’ak tebes.

“Primeiru, ha’u la hatene katak, COVID-19 ne’e kona tiha ona ha’u entre loron 27-29 abríl. Ha’u sente moras maka’as no kontaktu Sala Situasaun Sentru Integradu Jestaun Krize (SIJK), hodi lori ekipa saúde mai halo teste swab ba ha’u ho ha’u-nia família,” Lourenço de Oliveira, haktuir.

Hosi teste swab ne’e, nia hatutan, rezultadu hatudu família iha uma-okos pozitivu, maibé balun asintomátiku no nia ho oan mane-boot mak sintomátiku, nune’e tenke evakua ba halo tratamentu intensivu iha sentru izolamentu Vera Cruz.

“Ha’u ba vasina, depois loron neen (6), ha’u komesa diareia, isin-manas, me’ar no ha’u dehan ba ha’u nia an katak, buat ruma la loos. Nune’e, ha’u kontaktu SIJK hodi lori ekipa saúde mai halo teste swab ba ha’u ho ha’u-nia família ho rezultadu hatudu ami pozitivu hotu kedan,” Lourenço de Oliveira, haktuir-tan.

Loron-rua liu tiha, Lourenço de Oliveira sente labele ona hodi kontakta kedan ba autoridade saúde, hodi lori ambulánsia evakua hosi rezidénsia ba izolamentu Tasi-tolu.

Bainhira to’o iha ne’ebá, ekipa médiku hala’o observasaun durante oras haat nia-laran, deside kedan halo evakuasaun ba sentru izolamentu Vera Cruz.

To’o iha Vera Cruz, Lourenço de Oliveira hateten, médiku-sira halo observasaun, no durante loron haat tenke tau soru ho okxijéniu, tanba han ladi’ak, isin moras hotu, liman-ain kolen to’o laiha vontade. 

“COVID-19 ne’e iha duni no perigu tebes. Kuandu ita tama ona izolamentu, ita foin sente katak, ita-nia mate ka moris iha ekipa saúde-nia liman. Tanba ita-nia família mós labele besik ita,” Lourenço de Oliveira hateten.

Tuir nia, esperiénsia iha sentru izolamentu Vera Crus, pesoál saúde-sira  kumpre sira-nia serbisu ne’ebé di’ak tebes, hodi atende pasiente hotu-hotu hanesan no laiha diskriminasaun. Nune’e, liu tiha loron lima, nia sente di’ak oitoan.

“Ha’u hakarak fó-sasin katak, COVID-19 ne’e iha ona ita-nia leet. Labele fiar ba ema-sira ne’ebé dehan COVID-19 ne’e bosok. Ha’u rasik pasiente pozitivu COVID-19 ne’ebé foin rekupera. Ha’u husu atu ita hotu kuidadu an no kumpre regra Organizasaun Mundial Saúde (OMS) ho Ministériu Saúde (MS), atu hadook an hosi propagasaun peste letál ne’e,” Lourenço de Oliveira tenik-tan.

Lourenço de Oliveira hatutan, fou-foun nia ulun to’os duni no nunka fiar katak COVID-19 ne’e eziste iha Timor-Leste. Maibé, bainhira COVID-19 ne’e afeta ba-nia saúde, hodi evakua tama to’o izolamentu Vera Crus, halo-nia terus tebes no hanoin laiha ona salvasaun ba nia-vida.

“Ha’u husu ba públiku no ba sira ne’ebé la fiar katak COVID-19 ne’e iha. Ha’u hakarak dehan, COVID-19  ne’e iha duni no tenke fiar ba ekipa saúde. Ha’u mós husu atu ita koopera ho pesoál saúde. Labele kontra ekipa saúde no labele tuda ambulánsia. Ne’e, ita halo pekadu boot, tanba bainhira ita ba izolamentu, úniku médiku-sira mak sei salva no halo tratamentu ba ita,” Lourenço de Oliveira hateten.    

Ikusliu, Lourenço de Oliveira hato’o agradesimentu ba ekipa saúde iha Vera Cruz, ne’ebé halo sakrifísiu boot, hodi salva pasiente pozitivu COVID-19 to’o pesoál saúde balun mós sofre tanba hetan mós pozitivu COVID-19.  

“Pesoál saúde iha Izolamentu Vera Cruz fó tratamentu di’ak tebes. Maibé, ha’u hanoin liu hosi sira tanba pesoál saúde-sira sei limitadu tebes, tanba pasiente COVID-19 barak liu iha Izolamentu Vera Crus,” nia tenik.

Durante iha Izolamentu Vera Cruz, Lourenço de Oliveira simu ai-moruk hosi médiku-sira depende ba moras. Sira ne’ebé  mear, hemu ai-moruk mear-nian no sira ne’ebé moras pulmaun, fó ai-moruk hamoos pulmaun nian no sona rutina to’o rekoperasaun.

Lourenço de Oliveira ho família ne’ebé ba halo tratamentu intensivu iha sentru izolamentu Vera Crus, iha 04 maiu, rekoperadu iha kinta (13/05), hafoin rezultadu teste hatudu negativu.

Jornalista: Felicidade Ximenes

Editór: Cipriano Colo

1 KOMENTÁRIU

  1. Semak lafiar ba moras ka peste Aat ne problema ninia lmportante ba Ita Mak ne : 1. Ita tenke fiar oms 2. Ita fiar nafatin ministerio da saude 3. Ita fiar nafatin sala de situasaun gestaun krize

HAKEREK NO HATÁN

Please enter your comment!
Please enter your name here