Ministra Negósiu Estranjeiru no Kooperasaun, Adaljiza Albertina Xavier Magno ko’alia hela ho reprezentante Embaixadór Uniaun Europeia iha Timor-Leste, Andrew Jacobs, bainhira halo konferénsia imprensa iha salaun MNEC, sesta (29/01/2021). Imajen TATOLI/Antonio Goncalves

DILI, 14 maiu 2021(TATOLI) – Uniaun Europeia (UE) ajuda Euro millaun ida (liu millaun $1.2) atu  finansia umanitáriu no responde  ba aumentu lalais  hosi kazu  COVID-19 iha fulan resente sira iha Timor-Leste.

Notísia Relevante : UE oferese fundu €100,000 mai Timor-Leste

Ajuda ida-ne’e sei foku atu aumenta kapasidade resposta iha área sira mak afetadu liu, inklui iha kapitál Dili ne’ebé rejista kazu barak liu to’o agora.

“Pesoál saúde no fasilidade sira iha Timor-Leste dada ona to’o ninia limite ho kazu COVID-19 aumenta ba daudaun iha nivel nasionál,” superviziona resposta umanitáriu hosi UE iha Timor-Leste,  Olivier Brouant hateten liuhosi komunikadu  imprensa ne’ebé Agência Tatoli asesu, sesta ne’e.

Olivier Brouant klarifika katak apoiu ne’e atu responde urjentemente ba sistema saúde nian atu bele aumenta tan kualidade hodi luta hasoru COVID-19.

“Ami responde lalais atu kanaliza apoiu urjente nune’e atu garante sistema saúde iha rai laran ekipadu didi’ak atu enfrenta pandemia ida-ne’e,”  Olivier Brouant haktuir iha komunikadu imprensa ne’e.

Finansiamentu hosi UE sei apoiu mós Organizasaun Mundiál Saúde (OMS) atu responde ba nesesidade sira urjente liuhosi intervensaun oin-oin.

“Ida ne’e inklui aumenta númeru fasilidade ba izolamentu-sira ba kazu lijeira no moderadu sira, fortalese kapasidade ba jestaun hosi kuidadu intensivu-sira iha ospitál prinsipál-sira, hadi’a sistema referénsia no transporte ba pasiente-sira, no fó formasaun ba profisionál saúde no apoiu. Sei sosa mós sasán vitál hanesan ai-moruk, sistema apoiu oksijéniu no ekipamentu protesaun pesoál,” nia tenik.

Antesedénsia

Rekupera ona husi inundasaun grave sira mak atinje Timor-Leste iha fulan marsu ikus, nasaun hosi sudoeste Aziátiku ida ne’e hetan aumentu drástiku hosi kazu COVID-19 iha nasaun tomak, ne’ebé reporta kazu besik 3,500 iha loron 12 maiu, kompara ho kazu sira menus 100 entre fulan abríl 2020 no fevereiru 2021.

Aumentu maka’as ba kazu sira fó ameasa sériu tebes ba nasaun nia sistema saúde mak frajil, ne’ebé sai sobrekaregadu lalais ho númeru ki’ik hosi kazu-sira. Nune’e, Dili sai afetadu liu ne’ebé estimativa ba ema na’in-20.000 mak bele infetadu ona.

Tuir agravamentu ba situasaun sira-ne’e, Governu extende tan estadu emerjénsia to’o loron 01 juñu, hanesan esforsu ida atu kontén númeru ba kazu-sira iha rai laran tomak.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here