Imajen/Espesiál UE

DILI, 16 abríl 2021 (TATOLI) – Uniaun Europeia (UE), sesta ne’e, aloka fundu €100,000 mai Timor-Leste atu tulun vítima dezastre naturál-sira iha teritóriu nasionál.

“Ami hato’o ami nia sinsera kondolénsias ba família vítima-sira hosi Siklone Seroja. Ami nia hanoin hamutuk ho sira ne’ebé lakon sira-nia uma no buka moris sira nia meius subsisténsia ami anunsia finansiamentu emerjénsia ida-ne’e ho espíritu solidariedade ne’ebé sei apoia Timor-Leste no Indonézia iha sira-nia esforsu hodi ultrapasa dezastre naturál ida-ne’ e, nune’e mós ho pandemia COVID-19. Uniaun Europeia prontu ona atu fó apoiu ba sira ne’ebé presiza,” Komisáriu ba Jestaun Krize Uniaun Europeia, Janez Lenarčíč hateten liuhosi komunikadu  imprensa ne’ebé Agência Tatoli asesu.

Apoiu fundu €100,000 sei aloka atu apoia populasaun sira ne’ebé afetadu liu iha Dili no munisípiu sira seluk, liu-liu uma kain vulneravel no feto no labarik feto sira, ne’ebé hetan impaktu hosi inundasaun, ne’ebé akontese foin lalais ne ‘e.

Apoiu umanitária hosi UE nian ne’e sei apoia organizasaun parseiru sira atu fó asisténsia diretamente ba uma-kain 200 no ema 1.140  ne’ebé afetadu hosi inundasaun no rai-monu, foin lalais ne’e.

Liuhosi fornesimentu apoiu osan no tékniku hodi hadi’a ba uma mahon ne’ebé di’ak liu, liuliu ba uma-kain sira ne’ebé afetadu maka’as tebes.

Projetu ne’e mós sei foka liubá partisipasaun no inkluzaun feto, labarik feto no grupu marjinalizadu sira seluk iha situasaun emerjénsia nian, ho foku ba identifikasaun no hasae sira-nia partisipasaun signifikativu iha prosesu foti desizaun umanitária.

Fundu Uniaun Europeia nian ida-ne’e disponivel liuhosi mekanizmu Resposta ba Protesaun Sivíl Europeia nian no Operasaun Apoiu Umanitária (ECHO) liuhosi ninia Mekanizmu Resposta ba Skala-Ki’ik (Small-Scal-Scale).

Jornalista   : Hortencio Sanchez

Editór         : Francisco Simões

 

HAKEREK NO HATÁN

Please enter your comment!
Please enter your name here