Pasiente rekoperadu Domingos Sávio. Imajen Tatoli/Maria Auxiliadora.

DILI, 30 marsu 2021 (TATOLI)—Pasiente COVID-19 ho naran Domingos Sávio Sarmento Magno Ximenes, ne’ebé rekopera ona hosi sala izolamentu Tasi-tolu fó sasin katak, durante iha fatin izolamentu ne’ebé Governu prepara, hetan tratamentu di’ak hosi médiku-sira, tanba fornese vitamina, hahán nutritivu, deskansa di’ak no konsege livre hosi moras ne’e.

Pasiente rekoperadu ne’e konsidera fatin izolamentu  ne’e  di’ak tanba  bele hetan protesaun atu moras ne’e labele  da’et ba ema seluk.

Notísia relevante:COVID-19: pozitivu 51, ativu 382

“Ha’u husu ba maluk-sira ne’ebé hetan COVID-19 lalika ta’uk, tenki pasiénsia, korajen no tenke koopera ho ekipa saúde atu bele livre lalais hosi moras ne’e,’’ Domingos Sávio hateten ba jornalista-sira iha sala izolamentu Tasi-tolu, tersa ne’e.

Nia konta tuir katak, bainhira detetadu pozitivu COVID-19, sente duni hahán ne’ebé nia konsumu laiha sabór, masin mós la senti meer, maibé nia luta makaas ho pesiénsia, tuir duni orientsaun médiku sira no ohin ninia rezultadu teste negativu dala-rua tutuir-malu hodi fila-hikas ba hamutuk ho família.

“Ha’u kona fofoun ne’e isin manas, mear no kakorok moras, laiha vontade atu han. Maibé ha’u fiar no halo tuir orientasaun médiku-sira,” nia fó sasin.

Pasiente ne’ebé mai hosi aldeia 4 setembru, suku Comoro, Postu Administrativu Dom Aleixo, Munisípiu Dili,  tama sala izolamentu Tasi-tolu iha loron 10 fulan marsu, ohin kompleta loron 20 no fila-hikas ba família hafoin hetan sertifikadu livre COVID-19 hosi médiku-sira.

Antes ne’e Koordenadór Forsa-Tarefa ba Prevensaun no Mitigasaun, Rui Maria de Araújo  lori Sala Situação Centro Integrado Gestão de Crise (SS-CIGC) nia naran, no mós ema hotu ne’ebé serbisu iha liña frente, agradese ema hotu ne’ebé detetadu pozitivu, hafoin kolabora di’ak-tebes ho ekipa konjunta saúde, aseita ba izolamentu iha fatin ne’ebé Estadu determina, atu hase’es-an hosi ema ne’ebé seiduak hetan da’et virus ne’e.

Rui Maria de Araújo apela mós ba komunidade iha fatin ne’ebé maluk rekoperadu-sira hela bá, favór labele tauk, tanba sira ne’ebé sai hosi fatin izolamentu, ekipa saúde sertifika ona, katak sira laiha ona risku atu hada’et-tutan virus ba ema seluk.

SS-CIGC, ohin rejista kazu pozitivu foun COVID-19 na’in 51, ne’ebé detetadu iha munisípiu Dili hamutuk 50,  Munisípiu Viqueque na’in-ida, iha pasiente rekoperadu na’in 11 no númeru pasiente atuál 382.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here