DILI, 12 maiu 2021 (TATOLI)-Teste swab obrigatóriu ne’ebé ekipa saúde realiza ba abitante-sira hamutuk 290 iha Suku Bairru-Pité, Postu Administrativu Don Aleixo, Munisípiu Dili, sábadu (08/05), hatudu rezultadu iha ema na’in-lima pozitivu ba COVID-19.
Notísia Relevante : COVID-19: pozitivu 140, ativu 1.723
“Kona-ba teste swab obrigatóriu ba abitante-sira iha Suku Bairru-Pité momentu abitante-sira ne’ebé tuir swab ne’e hamutuk 290, hosi númeru ne’e rezultadu fó sai iha segunda (10/05) hatudu, na’in lima pozitivu,” Xefe Suku Bairru-Pité, João Baptista da Costa Belo, informa ba Agência Tatoli iha Sede Suku Bairru-Pité, Dili, kuarta ne’e.
Abitante na’in-lima ne’ebé pozitivu COVID-19, Xefe Suku João Belo haktuir, na’in-haat tama ona izolamentu no ida halo auto-izolamentu iha uma de’it, tanba pasiente refere nia uma boot, pesoál saúde sira rasik ba haree fatin refere katak bele, nune’e pasiente halo auto-izolamentu iha uma de’it.
Lideransa komunitáriu ne’e mós klarifika katak, abitante-sira hosi Suku Bairru-Pité antes ne’e seidauk hetan informasaun kona-ba swab nian, ho nune’e, sira ta’uk no lakohi kolabora ho parte saúde atu tuir teste swab, maibé bainhira parte saúde hamutuk ho lideransa komunitáriu fó informasaun ba sira kona-ba lala’ok swab nian, agora hotu-hotu koopera hakarak teste swab.
“Sira loroloron mai Sede Suku hein ita-nia pesoál saúde-sira mai atu hasai swab, maibé informasaun ne’ebé hosi ita-nia parte saúde pasa mai dehan, vasina AstraZeneca hosi Austrália mai ona ne’ebé komunidade bele simu uluk vasina mak swab tuir fali mós di’ak,” nia tenik hodi dehan tan, abitante-sira mós prontu ona atu simu vasina AstraZeneca tuir oráriu iha loron 25 maiu to’o 15 juñu 2021. Suku Bairru-Pité iha Aldeia hamutuk 26 ho totál populasaun 34.000.
Jornalista : Arminda Fonseca
Editór : Francisco Simões