Abitante simu vasina AstraZeneca iha lansamentu dozes dahuluk, faze daruak, iha Sentru Saúde Comoro, segunda (10/05/21). Imajen Tatoli/António Gonçalves.

DILI, 11   maiu 2021 (TATOLI)—Sala Situasaun Sentru Integradu Jestaun Krize (SIJK), rejista kazu pozitivu COVID-19 hamutuk 140, rekoperadu na’in-ida no kazu ativu 1.723.

“Kazu foun 140 ne’ebé detetadu iha Dili 130 no munisípiu seluk na’in 10. Totál kazu ativu 1.723,’’ Koordenadór Forsa-Tarefa ba Prevensaun no Mitigasaun, Rui Maria de Araújo, hateten liu hosi komunikadu, tersa ne’e.

Notísia relevante:COVID-19: pozitivu 126, rekoperadu 82 no ativu 1.584

Hosi totál kazu detetadu  foun  ohin  mane 78 feto 62, ho idade tinan 12 na’in-rua, entre tinan 12-59 na’in 135 (96,4% ), ho idade 60 na’in-tolu no proporsaun kazu sintomátiku hamutuk 15,7%.

Totál kazu konfirmadu kumulativu sura hosi 21 marsu 2020 to’o ohin hamutuk 3.493.

Hosi horiseik mai ohin, hamutuk hotu Laboratóriu Nasionál Saúde halo  testes PCR 1.214, ho detalla hanesan tuir-mai, Vijilánsia sentinela 34, Rastreiu ba kontaktu ka Contact tracing 130, Rastreiu Aleatóriu ka Random Screening 462, Viajen sai hosi serka sanitária munisípiu Dili 541, Viajen internasionál laiha, Follow up iha kuarentena 37.

Totál testes PCR ne’ebé halo horisehik  iha munisípiu-sira seluk RAEOA no HNGV hamutuk 653, ho detalla hanesan tuir-mai, Baucau 155,  Maliana 17, Maubisse 171, Suai 142, Ermera laiha,  Viqueque 62, RAEOA 20 no HNGV 68.

Tabela evolusaun surtu COVID-19 iha Timor-Leste, hosi 21 marsu 2020 to’o 11 maiu 2021, Aileu ualu kazu esporádiku, Ainaro 22 kazu esporádiku, Baucau 170  kazu detetadu foun iha oras 24 rua kazu  iha cluster, Bobonaro 17 kazu esporádiku,  Covalima 65 kazu detetadu foun iha oras 24 neen kazu iha cluster, Dili 2.941, totál kazu oras 24 iha 130  óbitu lima kazu iha transmisaun komunitária.

Ermera 51, total akzu foun iha oras 24 kazu iha cluster, Lautem 22 kazu esporádiku, Liquiça 17  kazu detetadu foun iha oras 24 rua kazu esporádiku, Manatuto neen kazu esporádiku,  Manufahi 52 kazu iha cluster, RAEOA ualu kazu esporádiku, Viqueque 19  kazu iha cluster.

Atu bele hatene surtu ida ninia evolusaun, no mós surtu ne’e aumenta ka diminui, indikadór ida ne’ebé matenek-na’in epidemiolojia nian uza, maka insidénsia.

Konvensionalmente insidénsia sukat totál kazu foun, kada loron, pur 100 mil habitantes, no hatudu risku ne’ebé populasaun iha atu hetan da’et moras ida.

Ba ohin loron, hosi insidénsia COVID-19 iha Timor-Leste durante loron hitu ikus mak 9,1/100 mil abitantes, enkuantu ba de’it munisípiu Dili ohin nian 30,1/100 mil abitantes. 

Insidénsia iha leten sei nafatin hatudu katak, munisípiu Dili maka fatin ho risku bo’ot liu atu populasaun hetan da’et no hada’et tutuan virus SARS-CoV-2.

Iha 11 maiu  2021, izolamentu Vera Cruz halo tratamentu ba kazu detetadu na’in 32. Iha área obstetrisia na’in 12, sirurjia ida, medisina interna na’in 18, neonatolojia na’in-rua. 

Sira na’in 12 iha obstetrisia, kategoria moderadu hotu, sira-nia kondisaun estável. Sira na’in 18 iha medisina interna, ida  grave uza hotu oksijéniu, na’in 17 moderadu.  Hosi kazu neonatolojia rua moderadu hotu.

Hakarak fo’o hanoin hikas ba públiku katak, bele uza númeru hotline 119, hodi kontakta ekipan operasionál iha Ministériu Saúde, ezemplu, bainhira hakarak halo swab ba teste PCR, bele kontakta 119, hafoin ema ne’ebé atende telefone sei enkamiña ba ekipa vijilánsia epidemiolójika hodi bele organiza.

Nune’e mós bainhira ida dúvida ka presiza atendimentu ruma relasiona ho Surtu COVID-19, halo favór liga ba 119.

Aproveita informa mós ba públiku katak, fatin atu halo teste PCR maka hanesan tuir-mai, bainhira sente moras isin-manas, mear, kakorok moras ka sintoma seluk tan bele ba konsulta iha Sentru Saúde ne’ebé besik, atu bele halo swab.

Bainhira atu husu autorizasaun esesionál sai hosi serka sanitária iha Dili, bele ba halo swab iha Centro Convenções Dili (CCD).

Bainhira sente katak, sai kontaktu-besik ba ema ruma ne’ebé deteta pozitivu ona, no seidauk hetan kontaktu Hosi ekipa konjunta saúde, bele liga ba númeru 119 atu organiza oin sá foti swab.

Ekipa Saúde na Familia (SnF) iha Sentru Saúde sira iha Dili, halo mós vizita ba bairru ho aldeia sira ne’ebé detetadu kazu barak ona. Sira ne’ebé iha sintomas, ka sente kontaktu besik ho kazu pozitivu ruma, bele hakbesik ba sira hodi halo swab.

Ba populasaun iha Timor-Leste laran tomak, favór respeita nafatin regra prevensaun no ijiéne individuál, ne’ebé Governu hatu’ur ona, atu prevene moras COVID-19 da’et ba mai.

Regra sira ne’e mak hanesan uza máskara, fase liman beibeik ho sabaun ka dezinfetante ruma, evita kose liman ba matan, inus ho ibun, bainhira kumprimenta-malu, la presiza ka’er-liman, bensa-liman, rei-malu ka haku’ak-malu,  evita halibur-malu barak, hamri’ik ka tur do’ok hosi ema seluk, mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here