iklan

NASIONÁL, JUSTISA, DILI, HEADLINE, LEI, SEGURANSA

PNTL aprezenta kazu oknum polísia tiru joven na’in-rua ba MP

PNTL aprezenta kazu oknum polísia tiru joven na’in-rua ba MP

Portavóz Komandu Jerál PNTL, Superintendente Xefe, Arnaldo de Araújo ko’alia ba jornalista-sira. Imajen/PNTL.

DILI, 12 maiu 2021 (TATOLI)—Polísia Nasionál Timor Leste (PNTL), munisípiu Dili, aprezenta ona kazu oknum polísia, ne’ebé deskonfia tiru-kanek joven na’in-rua iha suku Caicoli, postu administrativu Vera Cruz, munisípiu Dili, ba Ministériu Públiku (MP).

Portavóz Komandu Jerál PNTL, Superintendente Xefe, Arnaldo de Araújo, labele fó-sai identidade oknum polísia ne’ebé deskonfia envolve iha kazu ne’e, tanba seksaun Departementu Justisa PNTL, halo ona investigasaun.

Notísia relevante:Konfrontu iha Mascarenhas, joven na’in-rua kanek todan

“Kazu asalta-malu entre grupu rua iha área Mascarenhas, rezulta ema kanek no estragus balun. Asaun polísia-nian mak fó avizu verbál, tiru avertênsia no ikus-mai polísia halo atuasaun, hodi rezulta joven na’in-rua kanek. Kazu ne’e kanalizadu ona no ita hein delegasaun kompeténsia hosi Ministériu Públiku,” Superintendente Xefe, Arnaldo de Araújo, hateten ba jornalista-sira iha Komandu Jerál PNTL, Caicoli, kuarta ne’e.

Nia esplika, pesoál PNTL ne’e konsideradu halo krime kontra regulamentu dixiplinár foun PNTL-nian.

“Prosesu investigasaun dixiplinár mós rejistadu ona hosi departementu justisa PNTL,” nia subliña.

Konfrontu entre grupu joven iha Mascarenhas ho Caicoli, akontese iha domingu (03/05) tuku 16:00 otl, rezulta joven na’in-rua hetan tiru ho pistola Glock-19, hanesan, Valdo dos Santos (20) sofre kanek iha kotuk laran no Pauleta de Jesus Carlos (17) hetan tiru iha kelen.

Família vítima rasik aprezenta ona keixa ba PNTL Dili, no Provedoria Direitu Umanu no Justisa (PDHJ sígla portugés).

Jornalista: Eugénio Pereira

Editór: Cipriano Colo

iklan
iklan

Leave a Reply

iklan
error: Content is protected !!