DILI, 03 maiu 2021 (TATOLI)—Konfrontu entre grupu joven hosi suku Mascarenhas no suku Caicoli, Postu Administrativu Vera Cruz, Munisípiu Dili, iha domingu (03/05) tuku 16:00 otl, rezulta joven na’in-rua kanek todan no baixa iha Hospitál Nacional Guido Valadares (HNGV).
Joven na’in-rua ne’ebé kanek, deskonfia hetan tiru hosi oknum membru Polísia Nasionál Timor Leste (PNTL), hosi postu Polísia Suku Mascarenhas, uza pistola Glock-19, bainhira hakalma direta konfrontu ne’e.
Notísia relevante:Konfrontu iha Becora, karreta PNTL rahun no detein ema na’in-14
“Konfrontu ne’e akontese ona mak membru polísia ne’e mai, lori pistola tiru kona ha’u nia kotuk laran no mós kolega ida naran Pauleta de Jesus Carlos (17) kilat-musan kona iha kelen,” Vítima Valdo dos Santos (20), hateten ba jornalista-sira liu hosi konferénsia imprensa iha rezidénsia, Caicoli, segunda ne’e.
Valdo dos Santos sofre kanek makaas iha kotuk laran no transporta kedan ba HNGV hodi hetan tratamentu médiku, oras ne’e daudaun alta no fila ona ba uma, enkuantu, Pauleta de Jesus Carlos hetan tiru iha kelen parte karuk no bala-musan borus, oras ne’e daudaun vítima kontinua hala’o tratamentu.
Alende ne’e, iha mós vítima seluk ho naran Ricardo Abrão da Costa António (18) ne’ebé kanek kamán iha parte ulun.
Valdo dos Santos konsidera atuasaun oknum polísia la neutru, tanba lori fali pistola tiru kanek joven-sira hodi abandona tiha joven balun hosi suku Mascarenhas ne’ebé lori arma branka.
Iha fatin hanesan, Delfina Verrela nu’udár sasin, trauma bainhira haree polísia foti pistola tiru hasoru joven-sira to’o monu, balun ran fakar iha ema barak-nia oin.
“Polísia ne’e tiru besik kedan ami ho distánsia kuaze metru lima, hodi sé pistola no tiru alin-sira,” nia fó sasin.
Família vítima konsidera asaun oknum polísia ne’e la merese atu akontese, tanba Timor-Leste hanesan nasaun demokrátiku.
Nune’e mós Olga de Jesus nu’udár inan hosi vítima Pauleta de Jesus Carlos, lamenta ho atasaun oknum polísia ne’ebé halo krime kontra direitu umanu no husu Komandu PNTL atu loke prosesu investigasaun ba pesoál ne’e.
Família vítima aprezenta ona keixa ba Provedoria Direitu Umanu no Justisa (PDHJ) hodi loke prosesu investigasaun.
Família mós prepara ona evidénsia hanesan envolku pistola glock-19, inklui rezultadu autopsia hosi HNGV hodi aprezenta mós keixa ba Komandu PNTL, Dili, maski iha domingu, hafoin akontesimentu família hato’o kedan keixa ba Komandu PNTL Dili, parte investigasaun kriminál.
Kona-bá ne’e, Komandante Jerál PNTL, Komisáriu Polísia, Faustino da Costa, promete sei hato’o ba Polísia Serbisu Investigasaun Kriminál (PSIK), atu halo investigasaun profunda.
“Liga ho akontesimentu iha Mascarenhas, oras ne’e daudaun ekipa investigasaun hala’o hela investigasaun,” Faustino da Costa hateten.
Komandu Jerál PNTL mós orienta ona Komandu PNTL Dili, hodi aprezenta relatóriu atu bele halo justifikasaun ba kazu ne’e.
Jornalista: Eugénio Pereira
Editór: Cipriano Colo