Membru Polísia Nasionál Timor-Leste (PNTL) Munisípiu Manatuto no FALINTIL-Forsa Defeza Timor-Leste (F-FDTL) hala'o parada antes tun ba terrenu hodi asegura selebrasaun tinan foun 2020, iha Munisípiu Manatuto, domingu (29/12/19). Imajen/PNTL Manatuto.

DILI, 12 maiu 2021 (TATOLI)—Konfrontu entre grupu joven iha área Laleia Vila, postu administrativu Laleia, munisípiu Manatuto iha tersa (11/05), rezulta membru Polísia Nasionál Timor Leste (PNTL), eskuadra Laleia na’in-ida sofre kanek.

Portavóz Komandu Jerál PNTL, Superintendente Xefe, Arnaldo de Araújo, hateten sarjentu polísia Paulino Abo Gusmão, sofre kanek iha parte ulun tanba hetan tuda hosi grupu rua ne’ebé asalta-malu, bainhira halo atuasaun ba konflitu ne’e.

Notísia relevante:PNTL sei rezolve kazu tuda rahun uma iha Comoro

Hosi akontesimentu ne’e, PNTL eskuadra Laleia konsege detein suspeitu balun, ne’ebé envolve iha konfrontu ne’e.

“Asalta-malu entre grupu rua ne’e, rezulta membru PNTL ida hetan kanek, tanba hetan tuda,” Superintendnete Xefe Arnaldo de Araújo hateten ba jornalista-sira iha Komandu Jerál, PNTL Caicoli, kuarta ne’e.

Maski la temi ema na’in hira mak parte polísia detein, maibé Arnaldo de Araújo dehan, parte PNTL eskuadra Laleia, koordena kedan ho autoridade suku no parte família, hodi buka solusaun atu evita konflitu iha futuru.

Ho kazu ne’ebé akontese, Komandu Jerál PNTL kontinua fó orientasaun ba Komandu munisípiu atu halo vizilánsia másima, hodi prevene  krimi iha munisípiu ne’e.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here