Membru PNTL blokeia pontu entrada Tasi-tolu, haruka-fila transporte públiku ne’ebé tula modo hosi Liquiça, no Ermera, segunda (03/05/21). Imajen Tatoli/António Gonçalves.

DILI, 12 maiu 2021 (TATOLI)—Konfrontu entre grupu joven ne’ebé akontese iha Ermera Vila, munisípiu Ermera, tersa (11/05) rezulta uma komunidade ida rahun no joven balun sofre kanek.

Portavóz Komandu Jerál Polísia Nasionál Timor Leste (PNTL), Superintendente Xefe, Arnaldo de Araújo, esplika, tuir dadus investigasaun ne’ebé Komandu munisípiu Ermera rekolla iha terrenu, katak, konfrontu entre grupu joven ne’e kauza hosi problema partikulár.

Notísia relevante:Konfrontu iha Laleia, membru PNTL ida kanek

“Asalta-malu entre grupu joven ne’e, rezulta joven balun kanek liuliu estraga uma ida,” Arnaldo de Araújo, hateten ba jornalista-sira liu hosi konferénsia imprensa, iha Komandu Jerál PNTL, Caicoli, kuarta ne’e.

Maski la temi ema na’in hira, maibé Arnaldo de Araújo, dehan, PNTL Ermera konsege halo detensaun flagrante delito ka kaer iha fatin akontesimentu ba suspeitu balun ne’ebé envolve direta iha konflitu ne’e.

“Komandu munisípiu Ermera aprezenta ona suspeitu ba Komandu Jerál, no oras ne’e halo hela identifikasaun,” nia subliña.

Oras-ne’e daudaun, PNTL Ermera halo ona seguransa másima iha fatin akontesimentu, hodi evita konfrontasaun.

Tuir dadus estatístika krime nasionál ne’ebé Agência Tatoli asesu hosi Komandu Jerál PNTL, janeiru 2021 rejista kazu 29 iha Ermera, fevereiru kazu hitu (7), marsu no abríl seidauk rekolla.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here