Sekretáriu Estadu Komunikasaun Sosiál, Merício Juvinal dos Reis ‘Akara’. Imajen TATOLI/Egas Cristóvão

DILI, 11 maiu 2021 (TATOLI)–Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, hasoru malu ho Primeiru-Ministru (PM), Taur Matan Ruak, hodi atualiza serbisu instituisaun ne’e bazeia ba delegasaun kompeténsia hosi Ministériu Asuntu Parlamentár no Komunikasaun Sosiál (MAPKOMS).

“Primeiru-Ministru komvida no ha’u atualiza progresu serbisu SEKOMS ne’ebé mak ami hala’o. Iha obstákulu balun ne’ebé ami enfrenta durante tinan-ida, hanesan ha’u-nia kompeténsia bazeia ba atribuisaun hosi Ministru Asuntu Parlamentár no Komunikasaun Sosiál, ha’u konsentra ba dezenvolvimentu mídia munisípiu no jere Sentru Formasaun Téknika Komunikasaun (CEFTEC, sigla portugés),” Sekretáriu Estadu Akara relata hafoin ramata reuniaun ho Xefe Governu iha Rezidénsia Farol, tersa ne’e.

Notísia relevanteMAPKOMS Delega Kompeténsia ba SEKOMS Atu Dirije Servisu Balun

 Kona-ba progresu dezenvolvomentu rádiu komunidade, tuir governante ne’e, dezenvolvimentu rádiu komunidade di’ak tebes tanba daudaun ne’e Governu konsege transforma hosi sistema konvensionál ba sistema modernu.

“Ami konsege moderniza sistema ne’ebé la’ós ona rádiu konvensionál bain-bain, maibé agora hanesan rádiu streaming ne’ebé estabelese hamutuk 12 ba populasaun bele asesu inklui iha ona website hodi fó asesu ba ema barak,” nia haktuir.

Aleinde ne’e, SEKOMS planeia atu dezenvolve mídia munisípiu atu nune’e populasaun iha munisípiu labele depende de’it ba mídia nasionál no ba kestaun ne’e munisípiu tolu hanesan hanesan Manufahi, Aileu no Lautém mak prontu ona atu hahú.

Kona-ba sentru formasaun, durante ne’e SEKOMS serbisu hamutuk ho Embaixada Portugal liuhosi Instituto Camões hodi dezenvolve formasaun lian portugés ba jornalista sira no konsege prodús ona revizór 100-resin, ne’ebé ho nível lian portugés di’ak.

Biban ne’e, Sekretáriu Estadu atualiza mós ba Xefe Ezekutivu kona-ba programa sosializasaun kombate hoax no promove internet saudável.

Notísia relevante: SEKOMS promove kampaíña kontra hoax no internet saudavel

“Primeiru-Ministru kontente tanba atu kombate hoax presiza kontribuisaun entidade hotu, ha’u halo analiza oitoan situasaun agora katak iha fenómenu ida maka envolve grupu balun promove dezinformasaun iha ita-nia rain, ne’ebé nia objetivu hakarak manipula públiku nia opiniaun atu tuir interese polítiku grupu balun no halo pániku sidadaun, inklui lansa lia falsu hodi populasaun la fiar Estadu,” nia subliña.

Tuir nia, solusaun mak tenke halo edukasaun sívika liuhosi kampaña nasionál kombate hoax no promove literasia dijitál hodi prepara sidadaun iha kapasidade atu uza meiu dijitál sira.

“Edukasaun sívika sei hala’o iha eskola no universitáriu sira. Ha’u dehan ba Primeiru-Ministru, ami laiha intensaun halo intervensaun ba indepedénsia editoriál, maibé ami hakarak garante liberdade imprensa ne’ebé kualker intervensaun tantu intervensaun polítika no ekonomia iha independénsia redasaun ne’e violasaun ba liberdade imprensa,” nia hatutan.

Maski nune’e, nia rekoñese, nu’udar Sekretáriu Estadu Komunikasaun Sosiál, nia pozisaun mak mantein liberdade imprensa no labele halo intervensaun independénsia redasaun iha kualker mídia tantu mídia Estadu no mídia privadu, tanba savi hosi liberdade independénsia ida mak liberdade redasaun.

Jornalista: Antónia Gusmão

Editora: Julia Chatarina  

HAKEREK NO HATÁN

Please enter your comment!
Please enter your name here