Husi liman karuk ba los Embaxador Australia iha Timor Leste, Espoza Primeiru-Ministru, Isabel da Costa Ferreira, SEKOMS akompana husi estudante sira iha kampaíña nasionál kombate hoax ka lia-bosok iha Golgota Mall. Imajen Tatoli/Antonio Goncalves

DILI, 23 outubru2020 (TATOLI) — Sekretáriu Estadu Komunikasaun Sosiál (SEKOMS) hamutuk ho entidade relevante no parseiru sira (stake holder)  kontinua halo kampaíña kontra hoax no promove internet saudavel.

Notísia Relevante : SEKOMS hakarak inisia lejizlasaun ‘kombate hoax’

Iha sesta lokraik ne’e, Sekretáriu Estadu Komunikasaun Sosiál, Merício Juvenál dos Reis “Akara” ho entidade sira halo marxa ida hahú hosi rotunda Prezidente Nicolau Lobato ba to’o Golgota Mall, Raikotu, Dili, ho sentidu haklaken mensajen ba públiku atu kombate hoax no promove internet saudavel.

Sekretariu Estadu Komunikasaun Sosial, Mericio Akara wainhira kualia iha kampaíña nasionál kombate hoax iha Golgota Mall. .Imajen Tatoli/Antonio Goncalves

Mericio  Akara hateten, kampaiña ne’e atu eduka sidadaun sira oinsá atu hasoru era foun ka mundu globalizasaun.

“Intensaun hosi kampaíña nasionál ne’e atu kombate hoax (lia-falsu) no promove internet saudavel. Ida-ne’e atu hasa’e ema hotu-hotu nia konsiénsia kona-ba impaktu negativu hosi hoax ba sosiedade, no oinsá atu redús sirkulasaun hoax liuhosi asaun rejeita fahe tutan informasaun falsu, hodi evita sosiedade konsumu informasaun ne’ebé loloos,” Mericio Akara hateten iha ámbitu kampaíña nasionál ne’e.

Nia dehan, iha era globalizasaun ne’e di’ak maka iha oportunidade ba ema atu hatene buat hotu, maibé iha mós dezvantajen boot bainhira uza sala.

“Iha era globalizasaun ne’e di’ak maka fó oportunidade ba ita hatene buat barak, maibé nia dezvantajen maka bainhira ita uza la kuidadu. Entaun Estadu no Governu iha responsabilidade boot prepara nia sidadaun atu tama ba era foun ne’e, nune’e hodi konsidera era foun ne’e fó oportunidade di’ak atu ita aproveita hodi dezenvolve ita-nia sivilizasaun foun no atu promove ita-nia nasaun ba mundu,” nia tenik.

Governante ne’e apela ba foin sa’e sira katak bainhira hetan informasaun ruma hosi media sosiál tenke buka tuir informasaun ne’e loos ka la’e, nia konteúdu ne’e fó vantajen no benefísiu ba ema hotu ka la’e, atu nune’e, labele hamosu hoax ne’e.

Notísia Relevante : CI komprometidu kombate “hoax” ho literásia mídia no literásia dijitál

Tuir planu atividade kampaíña nasionál kombate hoax governu sei kontinua ba eskola sekundária, universidade no munisípiu hotu-hotu atu nune’e bele kombate hoax.

Iha fatin hanesan Adjuntu Komisaun Anti-Korrupsaun (CAC-sigla portugé), Alex Gusmão hateten, ko’alia kona-ba hoax joven tenke defende lia-loos no sai naroman no masin mundu nian.

“Mai ita hamriik hamutuk kombate hoax no ko’alia lia-loos la’ós lia bosok,” nia subliña.

Embaxadór Austrália iha Timor-Leste, Peter Roberts. Imajen Tatoli/Antonio Goncalves

Embaixadór Austrália ba Timor-Leste (TL), Peter Robert Oam, dehan, atu evita hoax, inan-aman mós iha responsabilidade atu hanorin oan oinsá atu uza internet ho saudavel.

Oportunidade ne’e, Prezidente Timor-Leste Press Union (TLPU), Manuel Pinto, atuál prezidente interinu Agência Noticiosa TATOLI.IP, afirma, fuan no kakutak maka sai sentru atu halakon hoax ka lia-falsu ne’ebé agora daudaun sai nu’udár ‘pandemia’ ne’ebé habelar ka haboot iha sosiedade hodi fó impaktu negativu ba ema-nia hanoin no mós hahalok.

Nia dehan, agora mundu hotu hasoru era globalizasaun ka era dijitalizasaun ida ne’e sai hanesan dezafiu boot ida, liu-liu Timor-Leste tanba bainhira uza sala era dijitál iha nia impaktu ne’ebé maka dala barak hamosu hoax ne’e.

“Hakarak ka lakohi dijitalizasaun mai ona iha ita-nia leet, maibé oinsá maka ita atu atinje ita-nia objetivu kombate lia-bosok, maneira simples maka husu ba ita-nia an maka kakutak ho fuan maka sai sentru atu kombate,” Manuel Pinto hateten iha nia diskursu bainhira sai oradór ba kampaíña nasionál kombate hoax  ne’e.

Nia esklarese kakutak no fuan maka sai sentru ba hoax, tanba bainhira atu halakon hoax ne’e nia desizaun mai hosi kakutak no fuan, tanba ne’e forma sala kakutak hamosu lia-falsu, maibé forma kakutak ne’e sai ema ne’ebé validade kontribui ona kontra lia-bosok.

“Ita-nia fuan antes atu fahe tutan informasaun ne’ebé ita hetan husu ba ita-nia aan katak informasaun ne’e nia vantajen ba ha’u ne’e saida, atu ne’e labele hamosu hoax ka lia-falsu ne’e,” nia tenik.

Atu evita hoax Prezidente TLPU ne’e apela ba jornalista sira servisu bazeia ba faktu hatudu dadus ho loos no disiplina verifikasaun.

Espoza Primeiru-Ministru, Taur Matan Ruak, Isabel da Costa Ferreira, partisipa iha kampaíña nasionál kombate hoax. Imajen Tatoli/Antonio Goncalves

Kampaña Nasionál kontra hoax no promove internet saudavel ne’e partisipa ekipa SEKOMS, espoza Primeiru-Ministru, Isabel da Costa Ferreira, Adjuntu Komisaun Anti-Korrupsaun, Alex Gusmão, Embaixadór Austrália mai TL, Peter Robert Oam, Embaixadór Cuba, Omar Lauro Marrero Betancourt, no estudante inklui entidade sira seluk.

Eventu ne’e hetan animasaun hosi grupu banda múzika nasionál The Kraken, banda São Miguel Arcanjo, Teatru, Youtubers TL no partisipa másimu hosi komunidade.

Voluntária : Arminda Fonseca

 Editór        : Francisco Simões

HAKEREK NO HATÁN

Please enter your comment!
Please enter your name here