Prezidente Konsellu Administrasaun RTTL, E.P, José António Belo ‘Taraleu’, asina termu pose, iha salaun Prezidénsia Konsellu Ministru, Palásiu Governu, tersa (11/05). Imajen TATOLI/António Gonçalves

DILI, 11 maiu 2021 (TATOLI)Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, ofisialmente fó pose ba Prezidente Konsellu Administrasaun Rádiu no Televizaun Timor-Leste, Empreza Públika (RTTL,E.P) foun, José António Belo ‘Taraleu’, ne’ebé simu mandatu ba períodu tinan haat.

Iha diskursu Prezidente RTTL,E.P emposadu kompromete sei serbisu hamutuk ho funsionáriu sira ho di’ak.

Seremónia pose Prezidente Konsellu Administrasaun RTTL, E.P, José António Belo ‘Taraleu’, iha salaun Prezidénsia Konsellu Ministru, Palásiu Governu, tersa (11/05). Imajen TATOLI/António Gonçalves

“Ha’u sei serbisu hamutuk ho funsionáriu RTTL,E.P tomak iha diresaun sira hotu no programasaun, tanba ne’e husu atu sai jornalista inovativu no kreativu ho neon badaen hodi halo programa barak ho tópiku oin-oin,” Prezidente RTTL,E.P dehan, iha seremónia pose, iha salaun Prezidénsia Konsellu Ministru, Palásiu Governu, tersa ne’e.

Nia mós komprometidu, iha tempu badak atu hadi’a kualidade informasaun hodi transmite ba públiku liuhosi kanál rádiu, televizaun, no plataforma online.

Notísia relevante: Governu nomea José António Belo lidera RTTL,E.P

“RTTL,E.P tenke sai hanesan mídia independente ne’ebé fó informasaun kredível, faktuál no balansu ba públiku no tenke sai ponte informasaun povu ho Estadu ou kontráriu. Tenke transmite mensajen entre parte rua ne’e, nune’e fó  informasaun loloos tuir faktus atu públiku labele simu informasaun falsu, tanba mídia ne’e sai fatór determinante hodi promove dame iha rai laran liuhosi infomasaun kredível, edukativu no responsável iha komunidade nia le’et,” nia subliña.

Nune’e, José António Belo husu atu jornalista sira ne’ebé haknaar-an iha RTTL,E.P atu sai kreativu, nune’e bele serbisu iha ambiente furak no naton hodi espresa talentu jornalizmu no bele kompete.

Prezidente Konsellu Administrasaun RTTL, E.P, José António Belo ‘Taraleu’, asina termu pose, iha salaun Prezidénsia Konsellu Ministru, Palásiu Governu, tersa (11/05). Imajen TATOLI/António Gonçalves

Iha sorin seluk, nia konsidera, RTTL,E.P la’ós fatin atu kondena no krítika Governu, maibé tenke kontribui fó solusaun liuhosi informasaun.

Prezidente RTTL,E.P mós komprometidu nu’udar empreza estatál, sei halo polítika atu buka osan rasik hodi la dependénsia demais ho osan Estadu.

“Ha’u fó prioridade ba marketing iha RTTL,E.P hodi hatuur planu ba oin,” nia hatutan.

José António Belo hakarak transforma mídia estatál ne’e sai profisionál liután, independente no responsável ba kualker produtu notísia ne’ebé lansa iha kualker plataforma.

Seremónia pose Prezidente Konsellu Administrasaun RTTL, E.P, José António Belo ‘Taraleu’, iha salaun Prezidénsia Konsellu Ministru, Palásiu Governu, tersa (11/05). Imajen TATOLI/António Gonçalves

“Jornalista labele iha palavra polítika iha kakutak, hodi nune’e bele hala’o knaar loloos tuir lei no kódigu konduta jornalista nian,” nia fó hanoin.

Durante asume knaar, Prezidente emposadu hakarak ajuda eduka timor-oan sai sidadaun di’ak iha prosesu dezenvolvimentu nasionál.

“Nune’e, bele hatene di’ak liután ida-idak ninia knaar ba Estadu, tanba ne’e nu’udar mídia tenke fornese informasaun no opiniaun oin-oin hodi hakbiit povu nu’udar na’in ba poder,” nia hameno.

Fó prioridade ba infraestrutura

Aleinde ne’e, José António Belo hakarak fó prioridade ba infraestrutura mídia estatál ne’e, tanba nota katak laiha ona kondisaun serbisu ba funsionáriu tanba edifísiu ladún favorável, tanba ne’e presiza edifísiu foun.

“Ha’u fiar ho Governu nia tulun bele halo mudansa ruma ba edifísiu RTTL,E.P, atu hadi’a estúdiu programasaun no informasaun. Ha’u hatene ida ne’e presiza orsamentu boot maibé hau husu ho haraik-an ba Governu dala-ida tan katak kestaun ne’e importante tebes ba empreza estatál ne’e,” nia dehan.

Seremónia pose Prezidente Konsellu Administrasaun RTTL, E.P, José António Belo ‘Taraleu’, iha salaun Prezidénsia Konsellu Ministru, Palásiu Governu, tersa (11/05). Imajen TATOLI/António Gonçalves

Ekipamentu balun ne’ebé RTTL,E.P uza, balun desde kedan tempu UNTAET, tanba ne’e nia konsidera presiza mós atualiza ekipamentu tuir padraun radiudifuzaun modernu.

Iha biban ne’e, Prezidente emposadu kongratula no apresia serbisu Prezidente RTTL,E.P, Francisco da Silva ‘Gary’. 

Iha fatin hanesan, Ministru Francisco Martins, tau konfiasa tomak ba Prezidente RTTL,E.P foun no konsidera nu’udar ema ne’ebé maka iha esperiénsia.

“Parabéns ba Prezidente foun ne’ebé simu ona pose ohin, ha’u fiar katak ho pose ne’e ita boot bele hala’o knaar ho di’ak hanesan saida maka hato’o ona iha diskursu ohin bele realiza,” governante ne’e enkoraja.

Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo. Imajen TATOLI/António Gonçalves

Durante okupasaun Indonézia, iha tinan 1990, José António Belo tama prizasaun durante tinan tolu tanba hamutuk forsa FALINTIL iha ai-laran hodi kontra okupasaun liuhosi asaun oin-oin.

Iha área mídia, José António Belo hanesan fundadór mídia imprime semanáriu, Tempo Semanal, hafoin iha tinan 2018 harii mídia online, Tempo Timor.

Hanesan mós fundadór Timor-Leste Press Union (TLPU), ne’ebé hanesan asosiasaun jornalista, ne’ebé daudaun ho membru kuaze 200.

Iha loron 05 maiu 2021, Governu liuhosi Rezolusaun ida ne’ebé aprezenta hosi Ministru Francisco Martins, iha reuniaun Konsellu Ministru, nomea José António Belo, sai Prezidente Konsellu Administrasaun RTTL,E.P.

Prezidente Konsellu Administrasaun RTTL, E.P, José António Belo ‘Taraleu’. Imajen TATOLI/António Gonçalves

Iha biban hanesan, ezonera atuál Prezidente Konsellu Administrasaun RTTL,E.P, Francisco da Silva ‘Gary’, ne’ebé antes ne’e hetan nomeasaun liuhosi reuniaun ezekutivu iha loron 09 janeiru 2019 ba mandatu tinan haat, maibé konsege hala’o knaar durante tinan rua ho balun de’it.

Seremónia pose ne’e partisipa hosi eis Prezidente Repúblika, José Ramos Horta, Prezidente Konsellu Diretivu Agência TATOLI, I.P, Manuel Pinto, Prezidente Conselho de Imprensa, Virgílio Guterres, inklui Padre no entidade mídia sira hamutuk ho Dirijente hosi MAPKOMS no Sekretaria Estadu Komunikasaun Sosiál (SEKOMS).

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here