Prezidente Konsellu Administrasaun RTTL, E.P, José António Belo. Imajen TATOLI/António Gonçalves

DILI, 05 maiu 2021 (TATOLI)—Governu liuhosi reuniaun Konsellu Ministru (KM) nomea atuál Diretór mídia online Tempo Timor, José António Belo, sai Prezidente Konsellu Administrasaun Rádiu no Televizaun Timor-Leste, Empreza Públika (RTTL, E.P) ba períodu tinan haat.

Proposta nomeasaun ne’e aprezenta hosi Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, no hetan apresiasaun másimu hosi ezekutivu sira no aprovasaun.

Iha biban hanesan, ezonera atuál Prezidente Konsellu Administrasaun RTTL,E.P, Francisco da Silva ‘Gary’, ne’ebé antes ne’e hetan nomeasaun liuhosi reuniaun ezekutivu iha loron 09 janeiru 2019 ba mandatu tinan haat, maibé konsege hala’o knaar durante tinan rua ho balun de’it.

Notísia relevante: Francisco da Silva Gary Posse Nu’udar Prezidente RTTL,EP

“Ne’e desizaun konfidensiál serbisu no desizaun ne’ebé Konsellu Ministru foti tanba konsidera proposta, hafoin rona Ministru Francisco Jerónimo fundamenta razaun ne’ebé maka motiva proposta refere. Konsellu Ministru laiha objesaun tanba kestaun ne’e kompeténsia MAPKOMS nia rasik kona-ba sé mak bele asume kargu Prezidente Konsellu Administrasaun RTTL,E.P,” Ministru Prezidénsia Konsellu Ministru, Fidelis Manuel Leite Magalhães, hateten hafoin ramata reuniaun ezekutivu, iha auditoriu Ministériu Finansa, Aitarak-laran, kuarta ne’e.

Tuir Portavóz Governu, desizaun ne’e bazeia ba ponderasaun, pontu vista no preokupasaun sira ne’ebé maka MAPKOMS iha, hodi ba oin bele hadi’a liután servisu empreza estatál ne’e.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here