Komandante PNTL Dili, Superintendente Xefe, Henrique da Costa, akompaña hosi Segundu Komandante, Superintendente, Euclides Belo no mós Segundu Komandante eskuadra Becora, Inspetór Assistente Paulino de Carvalho entrega nesesidade bázika ba família afetadu inundasaun hosi aldeia Darlau. Imajen/PNTL.

DILI, 11 maiu 2021 (TATOLI)—Polísia Nasionál Timor Leste (PNTL) Munisípiu Dili, eskuadra Becora, fó apoiu ai-han báziku ba komunidade afetadu dezastre naturál hamutuk família 23 hosi aldeia Darlau, suku Becora, postu administrativu Cristo Rei, munisípiu Dili.

Ai-han báziku ne’e mak hanesan, foos, super mie, kafé, masin-midar no susu-been, entrega direta hosi Komandante PNTL Dili, Superintendente Xefe, Henrique da Costa, akompaña hosi Segundu Komandante, Superintendente, Euclides Belo no mós Segundu Komandante eskuadra Becora, Inspetór Assistente Paulino de Carvalho.

Notísia relevante:SEPS oferese apoiu emerjénsia ba família 1.371 iha Kampung Alor

Superintendente Xefe, Henrique da Costa hateten, maski apoiu ne’e ho kuantidade kiik, maibé iha valór umana hodi hakmán vítima sira-nia sofrimentu.

Nia hatutan, PNTL la’ós de’it hala’o misaun atu ezekuta lei no promove pás iha sosiedadade-nia leet, maibé hala’o mós misaun importante, atu fó apoiu umanitáriu ba povu ne’ebé sofre ba inundasaun ne’ebé akontese iha Timor-Leste.

Iha fatin hanesan, Inspetór Assistente Paulino de Carvalho, hateten vítima-sira ne’ebé simu apoiu kompostu hosi xefe família 26 ho númeru populasaun 148.

“Vítima hirak ne’e to’o agora seidauk hetan apoiu ruma. Ami hetan kontaktu hosi autoridade lokál Darlau katak, komunidade falta ai-han no labele tun ba Dili tanba estrada kotu. Tanba ne’e, ha’u buka apoiu hodi koordena ho komandante-sira bele mai fahe ba ita-nia povu,” Inspetór Assistente Paulino de Carvalho  hateten ba jornalista Agência Tatoli via telefónika, tersa ne’e.

Tuir dadus ne’ebé PNTL eskuadra Becora rekolla katak, vítima hirak-ne’e balun uma hetan estragu totál hosi inundasaun, no mós movimentu paradu tanba estrada kotu.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here