Sekretáriu Estadu Protesaun Sivíl (SEPS), Joaquim Gusmão, simbolikamente oferese apoiu emerjénsia ba família hamutuk 1.371, iha suku Kampung Alor, postu administrativu Dom Aleixo, munisípiu Dili, tersa ne’e. Imajen Tatoli/Nelson de Sousa.

DILI, 11 maiu 2021 (TATOLI)—Sekretária Estadu Protesaun Sivíl (SEPS), oferese apoiu emerjénsia ba família hamutuk 1.371 iha suku Kampung Alor, postu administrativu Dom Aleixo, munisípiu Dili, ne’ebé afetadu ba inundasaun iha 04 abríl.

Sasán ne’ebé família afetadu-sira simu ho pakote, kompostu hosi ai-hán  hanesan foos, mina bimoli, susu-been, ikan lata, super mie, biskuit, sasán kuziña ho sira-seluk.

Notísia relevante:SEPS oferese apoiu emerjénsia ba família 391 iha Laclubar

Apoiu ne’e simbolikamente oferese direta hosi SEPS, Joaquim Gusmão ba família afetadu-sira iha sede suku Kampung Alór, tersa ne’e.

Joaquim Gusmão, hateten tuir dadus ne’ebé rekolla, família suku Kampung Alor iha 1.371  ne’ebé afetadu, mai hosi aldeia tolu hanesan 01, 02 no 03.

Tersa ne’e, ekipa SEPS ho autoridade lokál fahe uluk sasán ba família hosi Aadeia 01 ho 02 hamutuk 494  no iha kuarta, aban sei kontinua distribui ba família  877 hosi aldeia 03.

“Apoiu ne’e atu bele hakmán família-sira nia sofrimentu durante situasaun kalamidade,” Joaquim Gusmão, hateten.

Xefe suku Kampung Alor, Alcina Carvalho Santos, lori komunidade nia-naran agradese ba Governu ne’ebé fó ona apoiu ida ne’e.

Tuir dadus hosi suku katak, inundasaun iha 04 abríl, família 1.000-resin mak evakua ba edifísiu Ministériu Finansa (MF) hodi salva an, tanba bee tama uma laran, estraga sasán hotu, no durante iha fatin evakuasaun, hetan asisténsia hosi Governu hanesan ai-hán tasak no atendimentu sira-seluk .

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here